Emakunde eta Ararteko, elkarrizketaren alde Alarde parekidea lortzeko

Emakundek eta Arartekoak “elkarrizketa” eskatu dute gaur, Hondarribiko Alardean emakumeek soldadu bezala parte hartu ahal izateko, eta ez kantinera bezala soilik.

Emakundek iragarri duenez, Izaskun Landaida zuzendaria eta Zuriñe Elordi idazkari nagusia Hondarribian izango dira ostiral honetan, Jaizkibel konpainia parekideari babesa emateko. Jaizkibelek Alarde baztertzailea baino lehen desfilea egingo du.

Emakundek gogorarazi duenez, Jaizkibel konpainiak 20 urte bete ditu. Konpainia parekidean emakumeek soldadu bezala parte hartzen dute.

Jaizkibeli babesa emanez, Emakundek “emakume eta gizonen parte-hartze parekidea” aldarrikatuko du herriko festetan; izan ere, Hondarribiak “bere ohiturak garai berrietara egokitu behar ditu”.

“Horrek ez du ohituraren aurka egitea suposatzen, aberastea baino, gizon zein emakumeei eskubide berdinak aitortuz”, erantsi du erakundeak.

Emakunderen hitzetan, “elkarrizketaren bideak emakumeen eta gizonen arteko errespetua eta berdintasuna ekarriko du”. Horregatik, “prozesu hori zuzentzeko” eskatu die “Hondarribiko Udaleko talde politiko guztiei”.

Zentzu horretan, “elkarrizketa sozialean” sakontzea “ezinbestekoa” dela uste du Arartekoak, “pertsona guztiek gozatzeko eta tokia izateko jaiak diseinatzeko”.

“Emakumeek Alardean parte hartzeko eskubidearen inguruan, Hondarribiko herritarren sektore esanguratsuen artean oraindik dauden desadostasunak gainditu” behar direla azpimarratu du Arartekoak.

Egun handia

Hondarribiko egun handia goizeko lehen orduan hasiko da, Jaizkibel konpainiaren desfilearekin, ondoren Alarde baztertzailearen txanda izango da.

Irunen ez bezala, Hondarribian konpainia parekideak egiten du desfilea lehenengo eta Alarde baztertzailearen zain diren ehunka herritarren aurretik igarotzen da. Ondorioz, tentsio uneak gertatzen dira, ekitaldi baztertzailearen aldeko emakumeek plastiko beltzak jartzen dituztelako, Jaizkibelen desfilea ikustea eragozteko.