Orduko 100 kilometrorainoko haize-boladak mendi inguruetan, eguerditik aurrera

Abisu horia ezarri du Eusko Jaurlaritzako Larrialdiei Aurre Egiteko eta Meteorologiako Zuzendaritzak asteazkenen honetan EAEko mendi inguruetako haizeguneetan, 15:00etatik 24:00etara.

Orduko 100 kilometrorainoko haize-boladak espero dira, bereziki, mendebaldean.

Era berean, abisu horia ezarri dute EAEn, baso-suteak sortzeko arriskua handia baita. 15:00etatik 24:00etara egongo da indarrean.

Lanbro arinarekin esnatu da eguna, baina, orduek aurrera egin ahala, zerua garbitzen joango da, eta, arratsalderako, ostarteak izango dira nagusi. Hego-osagaiko haize bizia ibiliko da, bolada gogorrekin.

Tenperatura minimoak igo egingo dira, gutxi bada ere, bereziki isuri atlantikoan. Maximoak, berriz, bere horretan mantenduko dira.

Arabako hainbat gunetan izotza egingo du.