Alicia umearen hiltzaileak 'ahotsak entzuten' zituela esan dute haren gurasoek

2016an, Gasteizen, Alicia umea hil zuen gizonaren gurasoek esan dutenez, akusatuak "zoraldiak" zituen, eta "ahotsak entzuten zituen", baina ez zuen inoiz tratamendu psikiatrikorik jaso. Bestalde, gaztearen bikotekide ohi baten hitzetan, "mutil normala zen", baina batzuetan "burutik jota egoten zen" eta "sexu-arazoak zituen", "aseezina" zelako, horren arabera.

Akusatuaren egoera psikologikoa zehaztea, balizko delirio edo obsesio sexualak argitzea, erabakigarria izan daiteke epaiketaren emaitzarako, izan ere, akusatuaren defentsak azaldu du gazteak haurra pisuko leihotik behera bota zuenean "erotuta" zegoela; umearen amak, aldiz, berarekin sexu-harremanik izan nahi ez zuelako hil zuela adierazi du.

Ministerio Fiskalak eta herri-akusazioak (Clara Campoamor Elkartea) espetxe iraunkor berrikusgarria eskatu dute akusatuarentzat, hilketa delitua egotzita. Gainera, haurraren ama hiltzen saiatzea leporatzen die. Gertaerak izan zirenean gizonak 30 urte zituen, eta emakumeak 18. Defentsak, bere aldetik, eroaldia inguruabar salbuesle oso gisa aplikatzea eskatu du.

Gazteak 2015 urte amaieran ezagutu zuen haurraren ama; gertaerak izan zirenean, 2016ko urtarrilaren 25eko goizaldean, emakumearekin eta haren alabarekin batera zegoen, Gasteizko pisu batean, gaua pasatzeko gonbidapena egin ostean.

Gaurkoa gertaera tragikoaren epaiketako hirugarren saioa izan da, Arabako Probintzia-Auzitegiko zigor arloko sekzioan. Akusatuaren aitak eta amak deklaratu dute, baita bikotekide ohiak ere; sei hilabeteko harremana izan zuen harekin, 2015ean.

Bestalde, ustezko hiltzailearen bikotekide ohi batek esan duenez, "mutiko normala" zen, baina batzuetan "burutik joanda egoten zen". Behin, lau bat kopa hartu eta marihuana erre ostean, bi gazteak gizonaren etxera joan ziren, eta, bertan, akusatua "erotu egin zen".

Lekukoaren hitzetan, akusatua ez zen pertsona "oldarkorra", baina sexu-harremanen arloan "emakumeak menderatzen zituela sentitzea gustatzen zitzaion". Bikotekide ohiak azaldu du beste bikotekide batzuk zituela aitortu ziola, eta horietako bat adingabea zela, eta, gainera, "laguntza" eskatu ziola, berak "arazo bat zuela bazekielako, sexuan emakumea menderatzearekin".

Bestalde, esan du akusatuak alkohola edan eta marihuana erre arren, kontsumoa ez zela "gehiegizkoa", eta "haurrak biziki gustatzen" zitzaizkiola gaineratu du.

Aitak eta amak "oso isila" dela esan dute, eta, haurra zenetik batzuetan "ahotsak entzuten" zituela. Eskolako kide batzuek abusuak egin zizkiotela ere adierazi dute, eta kanpamentu batean sexu-abusuak jasan izanaren "susmoa" duela azpimarratu du aitak.