Bilboko txosnek erasoen aurkako mezuak erakutsiko dituzte Aste Nagusian

Bilboko Konpartsek eraso sexisten aurkako mezuak jarriko dituzte Aste Nagusian, "argi geratzeko inon ez dela eraso sexistarik onartuko eta erasotzaileak ez direla ongi etorriak".

Lehiaketa gastronomikoaren aurkezpenean egindako adierazpenetan, Bilboko jaietan eraso sexistekiko tolerantzia "zero da, iaz ere zero izan zen eta lehenago ere zero izan zen", gogorarazi du konpartsetako Oihana Pascual kideak.

Eraso sexistarik egotekotan konpartsek aktibatzen duten salaketa protokoloari dagokionez, "beste kolektiboekin alderatzen den eta urtero eboluzionatzen duen elementua da", nabarmendu du Pascualek.

Horri dagokionez, protokoloko pausoak "publikoak dira eta gure web-orrialdean daude lagundu nahi duenarentzat", adierazi du. Hala ere, ez dela erantzun protokolo bat soilik zehaztu du: "Gertatu ahal izan denetik egiaztatze lana, segizio lana, errefusa eta mugimenduen deialdia ere barnebiltzen ditu".

Lana "a priori"

Azken puntu horretan, "garrantzitsua ez da gertatzen ari denarekiko errefusa bakarrik erakustea, gerta ez dadin eta gaizkideak ez izateko eta erasorik ez onartzeko lan egitea baizik; ez bakarrik a posteriori, baita a priori ere", azpimarratu du.

Gizartea edo erakundeak talde feministen eskakizunen atzetik doazen galdetuta, Pascualek beraiei ez dagokiela "gizartea edo instituzioak atzetik joan diren baloratzea" erantzun du.