Fiskaltzak helegitea jarriko du Manresako bortxatzaileei ezarritako zigorraren aurka

Bartzelonako Fiskaltzak helegitea aurkeztuko du Manresako talde bortxaketaren egileak sexu erasoengatik zigortzeko, eta ez abusuengatik. Zigortuek 14 urteko neska bat bortxatu zuten industria-nabe batean.

Fiskaltzak helegitea aurkeztuko du asteazken honetan Bartzelonako Auzitegiko 22. sekzioaren epaiaren aurka; izan ere, joan den ostegunean 10 eta 12 urte arteko kartzela zigorra ezarri zien sei auzipetuetako bosti, 2016ko urrian gertatutako talde bortxaketagatik.

Zigortuak behin-behineko askatasunean daude, eta, horietako bat bakarrik egon zen bi urtez behin-behineko espetxealdian, talde bortxaketaren ondorioz irekitako auziagatik.

Bartzelonako Auzitegiak Fiskaltzaren irizpidearen aurka zigortu zituen bost auzipetuak; izan ere, epaiketaren hasieran sexu-abusuak egitea leporatzen zien arren, behin betiko ondorioetan eskatu zuen sexu-erasoengatik kondenatuak izan zitezela, biktima beldurtu zutela iritzita, haren nagusitasun numerikoaz eta adingabearen horditasun-egoeraz baliatuta.

Epaian, aretoak "harridura" adierazi du Fiskaltzak epaiketaren behin betiko ondorioetan irizpide aldaketa egin duelako.

Auzitegiaren iritziz, biktima bortxatu zutenean "konorterik gabe zegoen, zer egiten zuen eta zer ez zuen egiten jakin gabe", eta hori bat dator Zigor Kodearen 181.2 artikuluarekin. Artikulu horren arabera, baimendu gabeko sexu-abusuak dira (...) zentzurik gabe dauden pertsonen aurka egiten direnak "edo biktimaren borondatea baliogabetzen dutenak farmakoen, drogen edo beste substantzia batzuen bidez".

Epaiak absolbitu egin zuen akusatuetako bat talde bortxaketagatik, auziaren instrukzioan ez zutelako abusu edo sexu-eraso delituengatik auzipetu, bai eta zazpigarren gizon bat ere, ustez masturbatu zena erasoa ikusten ari zela, eta sorospen-omisio delitua egozten zitzaiona.