LOMCE indargabetuko duen Hezkuntza Legearen proiektua onartu du Sanchezen Gobernuak

Ministroen Kontseiluak astearte honetan onartu du Hezkuntzaren Lege Organikoa Aldatzeko Lege Organikoaren (LOMLOE, gaztelaniazko siglak) proiektua. Isabel Celaaren Ministerioak egindako erreforma hau duela urtebete onartu zen, 2019ko otsailaren 15ean, hauteskundeak aurreratu ziren egun berean, eta, ondorioz, tramitazio parlamentarioa eten egin zen.

"Espainiako hezkuntza sisteman eragin eraldatzaile handia izango duen hezkuntza proiektu oso baten lehen pieza da, bikaintasunean eta zuzentasunean oinarrituko dena", laburbildu du Celaak Ministroen Kontseiluaren osteko prentsaurrekoan. "Inor ezin da atzean geratu, herrialde batek guztion talentua behar duelako", aldarrikatu du.

Celaak azpimarratu duenez, "irakaskuntza pertsonalizatua da LOMLOEren bihotza", eta helburu nagusien artean du "ikasleak arrazoi sozioekonomikoengatik edo beste edozein motatakoengatik bereiztea" saihestea; horregatik, ezabatu egingo ditu Hezkuntzaren Kalitatea Hobetzeko Lege Organikoak (LOMCE) Bigarren Hezkuntzan egin zituen ibilbideak.

Horrenbestez, LOMLOEk erabat indargabetu nahi du indarrean dagoen LOMCE, Alderdi Popularrak 2013an onartutakoa. LOMCE edo 'Wert Legea' zalantzan jarri dute ordutik hezkuntza komunitatearen zati handi batek. Haren indargabetzea behin eta berriz agindu du PSOEk, eta sozialistek eta Unidos Podemosek sinatutako koalizio gobernu akordioaren puntuetako bat ere bada.

Celaak hezkuntza etapa bakoitzerako erreformaren asmoetako batzuk zehaztu ditu. Horren harira, Haur Hezkuntza 0 eta 3 urte bitartean zabaltzeko "ahaleginaz" hitz egin du. Halaber, Lehen Hezkuntzan zikloen araberako ebaluazioa egingo da, etapa horretan "nahi ez diren errepikapenak" areagotu ez daitezen; izan ere, 'Wert Legea' ezarri zenetik % 15 hazi da.

Bigarren Hezkuntza "etapa erabakigarria" da ministroaren iritziz, eta "talentuen kanalizazioa" ezabatuko da, 13 urte betetzen dituztenean LOMCEk ikasleentzat egindako ibilbideei erreferentzia eginez. "Oztopoak zeuden tokian etorbide zabal bat ezarri dugu, Bigarren Hezkuntzako titulaziora daramaten bide desberdinekin. Zer prestakuntza gutxiago izan behar du espainiar batek DBH baino", esan du Celaak bere erreformaren helburuetako bat azpimarratuz: Bigarren Hezkuntzan tituludunen kopurua handitzea.

Celaak gogorarazi duenez, haren hezkuntza erreformak Eskola Kontseiluei erabakitzeko ahalmena itzuli nahi die, Lanbide Heziketa sustatu, garapen iraunkorra ikasgeletan sartu eta egungo curriculuma eraldatu, "entziklopediko eta memoristikoegia" delakoan.

Erlijioa "borondatezkoa" izango da

Kazetarien galderei erantzunez, Celaak azaldu du Erlijioa ikasgaiak "derrigorrezko eskaintza" eta "borondatezko onarpena" izango duela, nahiz eta ez duen orain arte bezala "ispilu ikasgairik" izango. Ikasleak sexuaren arabera banatzen dituzten ikastetxe pribatuei itunak kentzeari buruz, ministroak "kategorikoki" adierazi du "lehentasunez" itunduko dela bereizten ez dituzten ikastetxeekin.

Era berean, Celaak ziurtatu du arauak "erabat" errespetatzen dituela Konstituzioa eta haren 3. artikulua, baita gaztelaniaren irakaskuntzari buruz Auzitegi Gorenak emandako epaiak ere. Zehazki, adierazi du legeak ezartzen duela derrigorrezko irakaskuntzaren amaieran ikasle guztiek gaztelania eta beren autonomia erkidegoko hizkuntza koofiziala jakitea eta erabiltzeko gaitasuna izatea.