Beste sei pertsona hil dira Gipuzkoako adinekoen egoitzetan eta bi Arabakoetan

COVID-19aren ondorioz hil diren Gipuzkoako egoitzetako adinekoen kopurua 117 pertsonakoa da dagoeneko, azken orduetan izandako sei hilketen ostean. 18 pertsonak positibo eman dute birusa detektatzeko probetan, eta beste hiruk hobera egin dute.

Eider Mendoza foru bozeramaileak jakitera eman duenez, kutsatutako 18 pertsonetatik 17, sintomarik ez duten pertsonak izan arren, Osakidetzak test bikoitzak (azkarrak eta PCR) egin ostean detektatu dituzte. Gainerako positiboa San Andresen diagnostikatu dute.

Alta jaso duten hiru gaixoekin dagoeneko 31 zahar eta 14 ezindu sendatu dira egoitzen foru sare osoan, baina oraingoz 314 kasu positibo daude.

Gipuzkoako adinekoen egoitzen sarea 65 zentrok osatzen dute, eta 5.425 pertsona artatzen dituzte. Horietatik 16tan izan dira positiboak.

Orain arte, 38 pertsona eraman dituzte Gurutze Gorriak Donostian duen zentrora, eta 37k ospitalean jarraitzen dute.

Arabari dagokionez, egoitzetako bi erabiltzaile hil dira koronabirusaren ondorioz, beraz, dagoeneko 118 dira laguntza zentro horietan hildakoak. Hala ere, azken orduetan ez dute koronabirusaren kasu positibo berririk erregistratu.

Pandemiak egoitzetan izan duen eraginaren azken eguneraketan, joan den asteleheneko egoerari dagokiona, Aldundiak jakinarazi du 43 erabiltzaile berreskuratu direla, eta kutsatutakoen beherakada txiki bat mantendu dela, 375, hau da, aurreko datua baino 8 gutxiago.

Egoitzek 25 pertsona eraman dituzte ospitaleetara, osasun egoera larrian daudelako, eta koronabirusak kaltetutako gehienak artatzeaz arduratzen dira (350). Kasu positiboetatik, 224 zentro pribatuetako erabiltzaileak dira, 143 foru egoitzetan bizi dira eta gainerako 8ak, lurraldeko udal ekipamenduetan.

Desgaitasuna duten pertsonen egoitzen esparruan 36 kasu positibo zenbatu dira guztira eta 4 pertsona ospitalean daude.