Nafarroako Gobernuak hiru minutuko isilunea egin du COVID-19ak hildakoengatik

12:00etan, Nafarroako Jauregiaren atarian jarri dira, segurtasun tartea errespetatuz, Chivite presidentea eta hainbat kontseilari.

Nafarroako Jauregiaren aurrean egin dute isilunea. Argazkia: EFE

AGENTZIAK | ERREDAKZIOA

2020/05/03 - 19:57

Azken eguneratzea

2020/05/03 - 19:57

Nafarroako Gobernuko hainbat ordezkarik, Maria Chivite presidentea buru zela, hiru minutuko isilunea egin dute koronabirusaren pandemiagatik hildakoen omenez.

12:00etan, Nafarroako Jauregiaren atarian jarri dira, segurtasun tartea errespetatuz, Chivite presidentea, Javier Remirez eta Jose Mª Aierde presidenteordeak, eta Elma Saiz, Eduardo Santos, Ana Ollo, Santos Indurain eta Itziar Gomez kontseilariak. Hiru minutuko isilunearen ondoren, txalo zaparrada jo dute.

Asteazkenean onartu zuen omenaldi hau Nafarroako Gobernuak eta Parlamentuak, Nafarroako Kontzeju eta Udalerrien Federazioak eta Iruñeko Udalak ere bat egin dute.

Egun hartan onartutako adierazpenean, Nafarroako Gobernuak "maitasuna, dolumina, errespetua eta dolua" helarazten zien hildakoen senide eta lagunei, "maite dituzunak modu naturalean ezin agurtuak areagotzen duen mina baitute".

Gainera, "pandemia honek eragin dituen kalte sanitario, sozial eta ekonomokoei ahal diren baliabide guztiekin aurre egiteko neurriak" hartzeko konpromisoa agertu zuen, "inor bidean utzi gabe".

Bide batez, "krisi honen aurka sektore publikotik zein pribatutik borrokan aritu diren profesional guztiei" euren esker ona adierazi zieten, baita Nafarroako herritarrei ere euren "esfortzu kolektibo eta ardura zibikoagatik", "norbere onena erakutsi baitute boluntarioki sortu diren ekimenetan partez hartuz edo arratsaldero txalo jotzera ateraz".

Nafarroako Ospitaleko Larrialdietako langileak ere atera dira isilunea egitera.

medikuak

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu arren, agintariek emandakoei bakarrik egin kasu. Gaitzaren sintomarik baduzu, EAEn bizi bazara, ohiko zure osasun-zentrora deitu. Era berean, zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, Osasun Batzordearen telefonora dei dezakezu: 948 290 290. Gogoratu, COVID-19 gaitza ez hedatzeko modurik eraginkorrena eskuak sarri garbitzea dela; ahoa estaltzeko maskarak gomendagarriak dira sintomak badituzu edo adineko pertsonekin edo immunodeprimituekin harremanetan bazaude, edo eta garraio publikoa erabiltzen baduzu. Dena dela, horien erabilera ez da derrigorrezkoa.