5 hildako eta 7 positibo berri EAEn, eta hildakorik ez baina 9 kasu berri Nafarroan

Koronabirusak eragindako pandemiaren ondorioz, 5 pertsona hil dira Euskal Autonomia Erkidegoan (EAE) azken 24 orduetan; beraz, 1.536 hildako izan dira orain arte. Horrez gain, 7 kasu berri baieztatu dituzte PCR proben bidez (infekzio aktiboak) eta 78 test azkar bidez (iragandako infekzioak), Eusko Jaurlaritzako Osasun Sailak larunbat honetan emandako datuen arabera (ostiraleko 24:00ak arte bildutako datuak).

PCR kasu berrietatik 6 Bizkaian atzeman dituzte eta 1 Araban. Gipuzkoan ez da positiborik izan beste egun batez.

Aurreko egunetan bezala, hildakoen kopurua 10etik beherakoa izan da eta PCR positibo kopuruak ere antzekoak izan dira. Horrenbestez, joera positiboa dela berretsi du Osasun Sailak. Atzo, 4.807 detekzio-proba egin zituzten: 3.247 PCR eta 1.560 test serologiko.

Orain arte 19.812 kasu baieztatu dituzte (13.515 PCR bidez eta 6.297) Euskal Autonomia Erkidegoan: 7.608 Bizkaian, 3.003 Araban eta 2.314 Gipuzkoan.

Bizkaian baieztatutako atzoko 6 kasuei dagokienez, Bilbon (2), Getxon (2), Sestaon (1) eta Ermuan (1) atzeman dituzte. Arabako kasuan, berriz, Gasteizen (1) bizi da azken 24 orduetan PCR bidez egindako probetan positibo eman duen herritarra.

Horrez gain, Euskaditik kanpo bizi diren herritarrei egindako probetan 589 kasu positibo atzeman dituzte orain arte EAEn, baina horietako bat ere ez azken sei egunetan, Eusko Jaurlaritzako Osasun Sailak jakinarazi duenez.

Osasun arloko krisi hau hasi zenetik, Euskadin 200.137 PCR proba eta 113.338 test azkar egin zaizkie 176.016 pertsonari (paziente askori behin baino gehiagotan egin zaizkie probak).

PCR proben bitartez, pertsona batek une horretan bertan birusa duen edo gaixo dagoen jakin daiteke. Test azkarrek, berriz, pertsona bat kutsatuta egon den ala ez jakinarazten dute, baina ez dute zehazten gaixotasuna garatu duen, oraindik duen edo dagoeneko sendatuta dagoen; izan ere, test azkarrek pertsona batek hartutako immunitatea edo sortutako antigorputzak neurtzen dituzte, eta, beraz, iraganeko infekzio bat isla dezakete.

Eusko Jaurlaritzaren arabera, azken 24 orduetan 123 pertsona sendatu dira (16.454 guztira, gaixoen %83,1a).

Bestalde, RO Indizea, kutsatu bakar batek batez beste zenbat pertsona kutsa ditzakeen adierazten duen indizea, 0,63koa da EAEn.

1.917 pertsona gaixo daude oraindik (% 9,1). Horietako 240 ospitaleratuta daude: 213 gela arruntetan eta 27 ZIUetan.

Osakidetzak asistentzia-jarduera berreskuratzen jarraitzen du

Nekane Murga Osasun Sailburuak adierazi duenez, datuek erakusten dute bilakaera positiboa izan dela, eta Euskadiren egoera duela hilabete batzuk baino askoz ere hobea dela. Horri esker, pixkanaka normaltasuneranzko bideari eutsi zaiola adierazi du, baita asistentzia-jarduerari dagokionez ere. Hala, Osakidetzak goizeko txandan jarduera kirurgikoaren ia% 100 berreskuratu du, eta ekainean arratsaldean ere programatzen hasiko dira.

Kanpo-kontsultei eta proba osagarrien berreskurapena motelagoa da eta jarduera % 40 eta % 70 artean berreskuratu dira. Une honetan, lan ez-presentzial handia egiten ari direla telefonoz azaldu du Murga sailburuak. "Pertsonen segurtasuna izan da Osasun Sailarentzat eta Osakidetzarentzat lehentasuna" adierazi du sailburuak, eta hala izaten jarraitzen duela berretsi du.

Sailburuak eskerrak eman dizkie profesionalei hilabete hauetan erakutsitako konpromisoagatik baita herritarrei ere hartutako neurriekiko izan duten ulermenagatik eta jarreragatik. Horren harira, Nekane Murgak erantzukizun indibiduala eta kolektiboa eskatu du, "gure jarreraren araberakoa izango baita egindako bidea ez desegitea" ohartarazi du.

Hondartzen erabilerari dagokionez, Murgak esan du COVID-19 ez dagoela oporretan eta ez direla errepikatu behar pilaketen irudiak. Pertsona bakoitzaren inplikazio aktiboa eskatu du hondartzen erabilera dinamikoa egiteko eta segurtasun-distantzia mantentzeko.

Nafarroan hildakorik ez, eta bederatzi kutsatu gehiago

Azken 24 orduetan, Nafarroan 9 koronabirus kasu berri atzeman dira eta ez da heriotzarik izan.

Horrela, 515 pertsona hil dira guztira, pandemia hasi zenetik, eta 5.287 kutsatuta izan dira.

Nafarroako Gobernuak emandako azken datuen arabera, atzoko gauerdira arte 63 pertsona ospitaleratu zituzten, aurreko egunean baino sei gutxiago. Horietatik 51 plantan daude, 10 ZIUn eta 2 etxeko ospitalizazioan.

Bestalde, 5 alta eman zituzten atzo.

Espainiako Osasun Ministerioak lau hildako jakinarazi ditu azken 24 orduetan, eta 43 heriotza azken astean

Osasun Ministerioak jakinarazi duenez, azken zazpi egunetan 43 pertsona hil dira COVID-19rekin Espainiako Estatuan; beraz, guztira, 27.125 pertsona hil dira, atzo jakinarazitakoak baino lau gehiago, larunbat honetan argitaratutako balantzearen arabera. (Datua kontraesankorra da EAEkoarekin, Eusko Jaurlaritzak 5 hildako jakinarazi baititu).

Azken egunean PCR bidez diagnostikatutako kutsatuen kopurua 271ra igo da, eta, beraz, kutsatutakoen kopuru osoa 239.228koa da.

Baieztatutako 271 kutsatze berrietatik 8 Andaluzian izan dira, 9 Aragoin, 19 Asturiasen, bakar bat ere ez Balear Uharteetan, 9 Kanarietan, 7 Kantabrian, 7 Gaztela-Leonen, 12 Gaztela-Leonen, 88 Katalunian, bakar bat ere ez Ceutan, 5. Melillan, 1 Murtzian, 9 Nafarroan, 5 Euskal Autonomia Erkidegoan eta 3 Errioxan.