Legebiltzarreko oposizioak iritzia eman du, Urkulluk alarma egoera eskatu ondoren

Maddalen Iriarte EH Bilduren Legebiltzarreko bozeramaileak babesa agertu die EAEn pandemiari aurre egiteko ezarritako murrizketa neurriei, baina Eusko Jaurlaritzari "azkarrago" jokatzeko eskatu dio, orain arte ez dutelako lortu "birusaren aurretik joatea".

Iriartek agerraldia egin du Eusko Legebiltzarrean, ostiral honetan, Jaurlaritzaren aginduz indarrean sartu diren neurriak aztertzeko.

"Eusko Jaurlaritzak azken egunetan eta azken orduetan hartutako neurriek Euskal Herria Bilduren babesa dute. Babes osoa", azpimarratu du.

Hala ere, Iñigo Urkullu lehendakariari neurri "sendoak" eskatu dizkio, eta horiek "etengabe eta azkar" ezartzea, eta gaineratu du administrazioak ezin duela erantzukizun guztia herritarren bizkar utzi.

"Oso garrantzitsua da guztiok arduratsuak izatea, zalantzarik gabe, baina Administrazioaren papera funtsezkoa da", gaineratu du.

Hori dela eta, osasun agintariek birusaren aurkako borrokan eraginkortasuna handitzeko hartutako erabaki batzuk lehenbailehen berrikusi behar dituztela esan du, batez ere kontaktuen bilaketari eta isolamenduari dagokionez.

"Hilabete asko igaro dira gutxienez 500 arakatzaile behar zirela esan genuenetik. Hala ere, positibo bakoitzeko oso kontaktu gutxi identifikatzen eta isolatzen direla da errealitatea".

Iriartek gaineratu du neurri sendoekin batera sektore kaltetuenei laguntzeko beste neurri batzuk ere hartu behar direla, hala nola ostalaritzari, eta Kataluniako adibidea jarri du, alokairuak merkatzeko ekimenak abiarazi baititu.

Halaber, telelanera itzultzeko aukera eta kontziliazio neurriak berrikustea eskatu du.

EH Bilduren buruzagiak iragarri du datozen asteak "oso zailak" izango direla, eta deitoratu egin du egunotan berriro ere agerian geratu dela euskal erakundeek herritarrak babesteko duten gaitasun mugatua.

"Pandemia honek agerian utzi du gure subiranotasun eza. Egungo autogobernuak ez digu erabateko gaitasunik ematen jendea zaintzeko eta babesteko politikak egiteko", azpimarratu du.

Ildo horretan, azpimarratu du Eusko Jaurlaritza ez dela gai izan mugikortasunari eta pertsonen elkartzeari nahitaezko mugak jartzeko, Justizia Auzitegi Nagusiak eragotzi egin diolako, Espainiako legedian oinarrituta. "Etorkizunean hartu beharreko neurri murriztaileak baldintza ditzakeen zerbait da", ohartarazi du.

Alderdien mahai bat eskatu dio Podemosek lehendakariari

Alderdien mahai bat deitzea eskatu dio Pilar Garrido Podemoseko koordinatzaile nagusiak lehendakariari.

“Pandemiaren bilakaera kezkagarria gelditzeko, neurri ezberdinak adosteko”, alderdien foro bat izatea “premiazkoa” dela uste du Garridok.

Podemos Ahal Duguk, babes juridikoa izateko, alarma egoera eskatzea dagoeneko proposatu zuela gogorarazi du Garridok. Lehendakariak azaroan alderdiekin izango duen bilera sortarekin jadanik nahikoa ez dela esan du Garridok. Alderdi guztiak mahai inguruan biltzea beharrezkoa dela iritzi du.

Urkulluk oposizioa kontuan hartu gabe alarma egoera eskatu izana kritikatu du Iturgaizek

Oposizioko taldeak kontuan hartu barik alarma egoeraren adierazpena eskatu ostean, Urkullu “hainbeste predikatzen duen elkarrizketatik eta adostasunetik aldendu” dela uste du Carlos Iturgaiz Euskadiko PPren presidenteak.

“Urkulluk alarma egoera eskatu duenaren berri prentsaren bidez izan du  Eusko Legebiltzarreko oposizioak berriro. Bitartean Osasun sailburuak ez du agerraldirik egin, eta ez espero”, argitaratu du Iturgaizek sare sozialetan.