Nafarroak covid-19aren aurkako neurriak malgutu ditu

Gaurtik, covid-19aren aurkako prebentzio neurriak malguagoak dira Nafarroan pandemiaren bilakaera dela eta. Hala, % 40ra igo du merkataritzagune ertain eta handien edukiera, ostalaritzako barrualdea ireki da % 30eko edukierarekin, eta ospakizunak egin ahal dira jatetxeetan. Era berean, bi bizikidetza unitate elkartu ahal dira eremu pribatuan, gehienez 6 pertsona.

Nafarroako Justizia Auzitegi Nagusiak berretsitako neurriak dira, eta Nafarroako lehendakariaren foru dekretu batean eta Osasun kontseilariaren foru agindu batean daude jasota. Neurri berriak martxoaren 11ra arte egongo dira indarrean, eta egoera epidemiologikoaren arabera luzatu edo aldatuko dituzte.

Ostalaritza

Osasun kontseilariaren foru aginduan agertzen denez, ezkontzak, bataioak eta jaunartzeak egin ahal dira jatetxeetan, gehienez ere 12 pertsonarekin barrualdean, eta 20rekin kanpoaldean.

Bestalde, aurreko astean aurreratu zuten moduan, baimenduta dago taberna, jatetxe eta kafetegietako barrualdean kontsumitzea, gehienez ere % 30eko edukiera errespetatuta. 

Nafarroako Gobernuaren esanetan, kontsumoa beti mahaian eserita egin behar da, 2 metroko distantzia egon behar da horien artean, eta gehienez 4 pertsona bakoitzean. Salbuespen gisa, 6 pertsona elkartu ahal dira mahaiak handiak direnean eta pertsonen artean metro eta erdiko distantzia bermatuta dagoenean.

Terrazek % 100ean jarraituko dute, eta ez erretzea gomendioa bada ere, debekatuta dago gainerako bezeroekin 2 metroko distantzia gorde ezin bada.

Eremu pribatuari dagokionez, bi bizikidetza unitate elkartu ahalko dira, baina gehienez ere 6 pertsona.

Merkataritza, kirola, kultura…

Merkataritzaren sektorean, hipermerkatuetako eta azalera ertain eta handiko denden edukiera % 30etik % 40ra igo da. Merkataritza txikian, berriz, % 50ean jarraituko dute.

Kirol jardueraren kasuan, eremu itxietan 10 pertsona elkartu ahal dira zuzendutako jarduera fisikoa egiteko, lehen baino lau gehiago. Korrikalariek musukoa eraman beharko dute 1,5 metroko distantzia gorde ezin badute.

Museo, monumentu eta erakusketei dagokienez, 12tik 18ra igo dute taldeetan gehienez ere bildu daitekeen pertsonen kopurua, eta turismo aktiboko irteeretan ere hori izango da gehienezko kopurua.

Azkenik, beilatokietan 25 pertsona elkartu ahalko dira barrualdean, eta 50 kanpoaldean, lurperatzeko ekitaldietan bezalaxe.

Nafarroako Gobernuak, Gobernu Irekiaren bidez, eguneratu egin du ohiko galdera-erantzunak biltzen dituen txostena.