EAEko jatetxeek mahaikideen erregistroa gorde beharko dute hiru astez

Bazkariak eta afariak eskaintzen dituzten Euskadiko ostalaritza-establezimenduek mahai bakoitzeko gutxienez pertsona baten harremanetarako datuak erregistratu beharko dituzte, covid-19ari aurre egiteko prebentzio-neurrien protokoloaren azken eguneraketaren arabera.

Osasun Sailak egindako eguneratze horren arabera, zerbitzuaren data eta ordua idatzi beharko dira, eta gutxienez hiru astez gorde, agerraldirik gertatuz gero kontaktuen jarraipena errazteko. Gainera, osasun-agintariei eman beharko zaizkie zerrendak, haiek hala eskatuz gero.

Dokumentuan gogorarazten da barrualdeetan kutsatzeko arriskua "argi eta garbi" aire librean  baino handiagoa dela. Hala, eskuak sarritan garbitzearen, gainazalak desinfektatu eta garbitzearen garrantzia azpimarratzen da, eta musukoa barruan erabiltzea derrigorrezkoa dela azpimarratzen da, edaria eta janaria irensteko unean izan ezik.

Terrazetan ere maskararen erabilera derrigorrezkoa azpimarratu du, pertsonen artean gutxienez 1,5 metroko distantzia mantendu ezin denean. Bizikideen artean neurri hori ez da bete behar. Halaber, dokumentuak argi azaltzen du ez dela komeni terrazetan erretzea.

Dokumentuan, une honetan baimendutako edukiera eta irekitzeko eta ixteko ordutegiak jasotzen dira. Gainera, barran eta zutik kontsumitzea galarazita dagoela adierazten da, eta mahaiko gehienez sei pertsona egon daitezkeela, bizikideak izan ezik.

Lokalek beren gehieneko edukiera edonork ikusteko leku batean erakutsi beharko dute, eta pertsonen zenbaketa eta kontrola ahalbidetzen duen prozedura bat izan beharko dute, zifra hori ez gainditzeko.

Garbiketari dagokionez, soluzio hidroalkoholikoak eskaini behar dituzte eta desinfekzioa indartu. Ahal den neurrian, eskudirua erabiltzea saihestu behar da, eta baxera ontzi-garbigailuetan edo garbitzeko tuneletan garbitu behar dute, 60 eta 90 gradu arteko tenperaturan.

Mahai batean bezeroak aldatzen diren bakoitzean, protokoloak gogorazten du mahaiak, aulkiak eta kontaktua izan dezaketen beste edozein gainazal garbitu behar direla, eta barra sarritan desinfektatu, elikagaiek edozein kutsadura-iturrietatik babestuta egon behar baitute. Halaber, debekatuta dago bezeroek barran euren kabuz janaria hartzea.

Ostalariek aireztapena naturala bada zeharkakoa izateko saiakera egin behar dute, eta horretarako aurkako hormetako leiho eta ateak ireki beharko dituzte. Aireztapena eragindakoa izanez gero, kanpoko airearen sarrera ahalik eta handiena izatea lortu beharko litzateke, eta aire bera birzirkulatzea saihestu. Airearen kalitatea egokia dela egiaztatzeko, CO2 neurgailuak erabiltzea gomendatzen da.