Hustu dute Arrotxapeako gaztetxea eta sei lagun atxilotu dituzte

Iruñeko Arrotxapea gaztetxea hustu dute dagoeneko. Tentsioz betetako goiza izan da eta istiluak izan dira. Sei pertsona atxilotu dituzte eta, gutxienez, 40 identifikatu ditu Polizia Nazionalak.

Gaur zen gaztetxea husteko ezarritako eguna, eta goiz-goizetik, jende asko hurbildu da Iruñeko auzoko Artika kalera, gaztetxeak berak egun batzuk lehenago egindako kontzentrazio-deialdiari erantzunez, eta polizia talde handi batekin topo egin dute, goizean zehar inguruan hegan ibili den helikoptero batekin, besteak beste.

Espainiako Polizia Nazionala inguru horretara hurbiltzen ari ziren pertsonak identifikatzen hasi da, eta lekukoen arabera, 08:15erako 40 pertsona zeuden identifikatuta. Poliziaren aginduz, elkarretaratzea Marcelo Celayeta gaztetxearen inguruko kalean egin behar izan dute.

Bien bitartean, poliziak 09:00ak aldera sartu dira gaztetxearen barruan. Eraikineko sarreretako batetik saiatu dira, atea jo dute, eta erantzunik jaso ez dutenez, bost minutu geroago, barruan egon zitekeen inoren erresistentziarik gabe, sartu egin dira.

Giroa berotzen joan da kanpoan. Elkarretaratzean parte hartu dutenek hainbat gailu pirotekniko eta ke-dispositibo jaurti dituzte. Hustearen aurkako oihu artean. Polizia Nazionalak manifestarien aurka egin du eta ihesaldian lehen pertsona bat atxilotu dute.

Manifestariak sakabanatu egin dira, eta agenteek beste bost pertsona atxilotu dituzte hurrengo minutuetan. Guztiak Chinchilla kaleko komisaldegira eraman dituzte.

Polizia gaztetxearen barruan ezkutatuta egon zitezkeen hiru pertsona bilatzen saiatu da, arrakastarik gabe, ustez eraikinetik bidalitako argazki bat sareetan zabaldu ostean, non hormigoizko egitura baten barruan hiru pertsona agertzen ziren.

Horrek baldintzatu egin du hustea. Goiz erdian, Esku-hartze Berezien ataleko foruzainak bertaratu dira txakur batekin, makina eta tresnekin, hormigoizko egitura aurkitzeko eta ustez bertan ezkutatuta zeuden hiru pertsonen presentzia egiaztatzeko edo baztertzeko.

Azkenik, Iruñeko Udaltzaingoak ziurtatu du ez zegoela inor eraikinaren barruan, eta sareetan zabaldutako irudia "zaharra edo faltsua" zela esan du, eta, ondorioz, amaitutzat eman dute eraikina hustea.

Jarraian, makinak eraikinean sartu dira eta oztopoak kentzen hasi dira, eraikin eraisten hasteko lehenbailehen.

Arrotxapeako gaztetxeak 5 urte beteko zituen bihar.

Etxebizitzak eraikitzeko proiektua

Iruñeko Udalak jakitera eman duenez, gaztetxea hustu eta botatzearekin, inguruko garapen urbanistikoa osatu ahal izango da, etxebizitzen etxadi berri bat sortuz.

Higiezina Udalaren jabetzako biltegi baten ondoan dago, eta bi eraikinak Arrotxapeko Plan Partzialaren A5 unitatean sartuta daude. Espazio hori Artica kalearen (24 eta 30 zenbakien artean) eta Artica zeharbidearen (z/g) parean dago, Udalak zehaztu duenez.

2007an, udalbatzak behin betiko onartu zuen "Iruñeko Arrotxapea Plan Partzialaren aldaketa. A5 unitatea". Bertan, antolamendu xehatua ezartzen da, lehendik dauden industria-eraikinak eraikin eta bizitegi- eta zuzkidura-erabilera bihurtzeko. Onartutako antolamenduaren arabera,  ondoko bizitegi-eraikuntzaren antzeko diseinuarekin osatuko da etxadia.

Gaur goizeko gaztetxearen husteari "prekarioagatiko utzarazpena" deritzo juridikoki,  Udalaren arabera, eta 4 zenbakiko Lehen Auzialdiko Epaitegiaren eginbideak zehaztu gisan egin da, Rotxapea IIIko A-5 Betearazpen Unitateko Konpentsazio Batzordearen salaketaren ondoren.

Epaiak demanda baietsi du, "baimenik gabeko okupazio bat dagoelako". Hustutako nabeak, epai judizialaren arabera, Caser merkataritza-enpresaren autoen tailerra eta Talleres San Pedro SLren zati bat hartzen zituen, eta urte batzuk zeramatzan jarduerarik gabe 2016ko irailean okupatu aurretik. Bi urte geroago idatzitako udal-txostenek adierazi zuten ez zituela "segurtasun-baldintzak betetzen konkurrentzia publikoko jarduerak garatzeko".