Klima-aldaketaren aurrean egokitzapenean eta erresilientzian erreferente gisa aitortu du EBk Euskadi

Europa Batasunaren Klima Aldaketara Egokitzeko Misioan parte hartzeko hautatutako eskualdeetako bat izan da Euskadi. Hala jakinarazi du Europako Batzordeak Bruselan, misio hori gauzatzeko aukeratutako lehen eskualdeen zerrenda argitaratu baitu.

Eusko Jaurlaritzako Ekonomiaren Garapen, Jasangarritasun eta Ingurumen Sailak ohar baten bidez jakinarazi duenez, izendapen horren arabera, Euskadi "eskualde aurreratua eta erreferentea da klima-aldaketara egokitzeko arloan, eta kalteberatasunaren eta arriskuaren diagnostiko integrala, naturan oinarritutako egokitzapen-neurriak eta prozesuan dauden beste jarduera asko ditu eta prest dago beste eskualde batzuekin bere esperientziak partekatzeko". 

Klima Aldaketara Egokitzeko Misioari atxikita, klima-aldaketara egokitzeko praktika-komunitate batean sartuko da Euskadi, hautatutako beste eskualdeekin batera, eta horrek aukera emango die sarean lan egiteko eta Europako beste eskualde eta erkidego batzuekin ezagutza eta esperientzia partekatzeko.

Zehazki, Euskadik, hautatutako eskualdeetako bat den aldetik, datozen hilabeteetan konpromiso hori formalizatu beharko du Europako Batzordearekin, eta horrek inbertsioei lotutako lan-plan bat diseinatzea eskatuko du. Egokitze-misioaren helburua da gutxienez Europako 150 eskualderi laguntzea 2030ean klima-erresilientzia lor dezaten.

Eusko Jaurlaritza 2002an Garapen Iraunkorraren Euskal Estrategia onartu zenetik ari da lanean klima-ekintzaren arloan, eta, hain zuzen ere, klima-egokitzapenaren arloan egin duen ibilbide oparoa jasotzen duen txostena aurkeztu zuen Egokitzapen Misiorako hautagaitzara. Arantxa Tapia sailburua buru duen sailak adierazi duenez, dokumentuan jaso diren "ibilbide honetako mugarri garrantzitsuenen artean aipatzekoak dira Klima Aldaketaren Euskal Estrategia, KLIMA 2050 eta hura hedatzeko LIFE Urban Klima 2050 proiektua, Euskadira egokitzeko bidean ibilbide-orri argi batekin aurrera egitea ahalbidetzen baitute".

Eskualde erakusle gisa, HORIZON-MISS-2021-CLIMA-02-04 deialdirako proiektu-proposamen bat aurkeztu du Europako beste 11 eskualderekin batera, erresilientzia klimatikoko irtenbide berritzaileak frogatu eta baliozkotzeko.

Proiektuaren baitan, Euskadiren helburu nagusia da estuarioak leheneratzeko egokitzapen-neurriak ezartzea, hain aurreratuak ez dauden eskualdeetarako eredu izan daitezen, halaber, klima-aldaketara egokitzearen inguruan Euskadiko eragile publiko eta pribatuen parte-hartzea mobilizatzea eta egituratzea ere badu xede.

Programa bat, bost misio

Euskadik parte hartuko duen Klima Aldaketara Egokitzeko Misioa Horizon Europa programaren bost egitekoetako bat da. Programa horren bidez, Europar Batasunak finantzaketa-programa, -politika eta -erregelamenduei dagokienez beharrezkoak diren baliabideak bateratu eta koordinatu nahi ditu, bai eta hainbat erronka lortzeko beste jarduera batzuk ere.

Zehazki, Klima Aldaketara Egokitzeko Misioaren helburu orokorra klima-aldaketara egokitzearekin lotutako politikak sustatzea da, eta hiru helburu espezifiko ditu: lehena, klima-erresilientziarako prestatzea, eskualdeei laguntza ematea ingurumenaren gaineko inpaktuak hobeto ezagutu ditzaten eta prestatuago egon daitezen; bigarrenik, klima-erresilientziarako eraldaketa bizkortu nahi du, eskualde horiei laguntza emanez baterako sorkuntza-prozesu berritzaileetan, ibilbide-orrien prestaketan eta ibilbide-orrien lanketan. Eta hirugarrenik, eta azkenik, klima-erresilientziaranzko eraldaketa sistematikoa gutxienez eskala luzeko 75 frogapen-proiektutan ezartzeko helburua du.

Horizon Europa programak 368.3 milioi euroko hasierako funtsa emango du 2021-2023 aldian Misioa betetzen laguntzeko. Misioa 60-100 eskualderekin hasiko da lanean epe horretan (2021-2023), eta, ondoren, beste 50-100 eskualde atxiki ahal izango zaizkio.