GIBaren transmisioak EAEn, egonkor eta beherantz; sexu-transmizioko infekzioek, gora

GIBaren transmisioek egonkor eta beheranzko joeran jarraitzen dute Euskal Autonomia Erkidegoan, eta, bitartean, sexu-transmizioko infekzioen kopuruak gora jarraitzen du. Hala ondorioztatzen du urtero Osasun Sailak eta Osakidetzak prestatzen duten Hiesaren eta Sexu Transmisiozko Infekzioen Planaren 2021eko memoriak; memoriak datu epidemiologiko nagusiak eta Euskadik eremu horretan hartutako neurriak jasotzen ditu.

Testuinguru horretan, iaz, Euskadin, GIBaren 119 infekzio izan ziren, hau da, 100.000 biztanleko 5,4 kasu. Halaber, GIBarekiko esposizio aurreko profilaxi-programak 434 pertsona tratatu ditu (duela bi urte abiatu zuten programa hori). 2021ean, Osakidetzak 6.122 pazienteri eman die arreta, guztira, erretrobirusen kontrako medikamentuak erabiliz.

Memoriak dioenez, 2021ean, areagotu egin ziren diagnostikoak infekzio mota guztietan. Zehazki, Osakidetzak lurralde bakoitzean dituen hiru kontsulta espezifikoetan honako hauek erregistratu ziren: 976 chlamyidia kasu, eta 2020an 679 izan ziren; 797 infekzio gonokoziko, aurreko urtean baino % 66,33 gehiago; 273 sifilis goiztiar kasu, aurreko urtean baino % 37,2 gehiago; eta 160 kasu herpes genitalenak, eta 2020an 158 izan ziren.

Txostenak zehazten du 2021etik aurrera Basurtuko eta Donostiako unibertsitate-ospitaleetako mikrobiologia-zerbitzuen diagnostikoak zenbatzen direla, bai eta Mendaroko ospitaleko STIen kontsulta ere; haiek lurralde-kontsultetakoei gehituta, Chlamydiako 1.479 kasu daude, gonokoziako 988, sifiliseko 294 eta herpes genitaleko 199.

GIBa

GIBari dagokionez, Euskadin, iaz, 119 infekzio erregistratu ziren, eta, aurreko urtean, 105; 2019an, 147; eta, 2018an, 171. Horrek esan nahi du 100.000 biztanleko 5,4koa dela tasa. % 84 gizonei dagokie, eta diagnostikatutako pertsonen batez besteko adina 38,9 urtekoa da, 2020ko bera.

GIBak eragindako infekzio gehienak sexu-transmisiokoak dira, eta, oraindik, gizonekin sexua duten gizonen artean transmititzen da nagusiki, diagnostiko guztien % 55,5 (2020an % 54,3 eta 2019an % 57,8). Bide heterosexualaren bidezko transmisioa % 39,5 da (% 35,2 2020an eta % 26,2 2019an).

Kasuen % 52,1ean (erdia baino gehiago; 2020an, % 52,4) diagnostikoa berantiarra izan zen, hau da, immunitate-sistema jada oso kaltetuta zegoenean detektatu ziren, 350 CD4 zelula baino gutxiagorekin.

Erretrobirusen aurkako tratamenduak

Osakidetzak, guztira, 6.122 pazienteri eman zien arreta erretrobirusen aurkako tratamenduekin 2021ean (6.016, 2020an). Erretrobirusen aurkako tratamendu orokorrak erabateko beherakada eragiten du hiesa garatzen duten pertsonen kopuruan; 2021ean, Euskadin hiesaren 25 kasu berri diagnostikatu ziren.

Errealitate epidemiologiko horren aurrean, Gotzone Sagardui Eusko Jaurlaritzako Osasuneko sailburuak aurten ere Hiesaren eta Sexu Transmiziozko Infekzioen Euskadiko Planean jasotzen diren prebentzio-ekintzako ildo guztiak erabat aktibo mantentzearen aldeko apustua egingo dela nabarmendu du.