Beroagatik eta baso-suteengatik Araban ezarritako alarma gorria astelehenera arte luzatu dute

Bizkaian eta Gipuzkoan alerta laranja ezarri dute beroagatik, eta baso-suteen arriskuagatik gaur ere. Hona hemen egun EAEn indarrean dauden alerta eta alarma guztiak, eta sute-arrisku larrialdi egoera honetan ezarritako debekuak eta murrizketak.

Kanpezun (Araba) 40º neurtu dira gaur, 35º Gasteizen, eta 38º Igorren (Bizkaia). Astelehen iluntzera arte ez du freskatuko kostaldean, eta asteartean barrualdean. — 40 graduren bueltan ibiliko gara asteburu honetan EAE osoan

AGENTZIAK | ERREDAKZIOA

2022/07/16 - 13:58

Azken eguneratzea

2022/07/17 - 10:30

Beroagatik eta baso-suteen arriskuagatik Araban ezarritako alarma gorria astelehenera arte luzatu du Eusko Jaurlaritzako Segurtasun Sailak, termometroak goranzko joerari eutsiko diolakoan. Bizkaian eta Gipuzkoan ere beroagatik alerta laranja ezarri dute, eta baso-suteen arriskuagatik gaur, igandean.

DEBEKUAK

Alerta laranjan murrizketak eta debekuak landa-lurzoruan edo lurzoru urbanizaezinean aplikatuko dira 13:00etatik 21:00ak arte. Alarma gorriko egoeran, murriztapen guztiak 24 orduz ezarriko dira.

Honakoak dira debekatuta egongo diren jarduerak, alerta ezarrita dagoen eremuetan:

- Sua erabiltzea edo sua eragin dezaketen jarduerak egitea. Hala nola, nekazaritza edo baso eremuetan txinpartak edo deskarga elektrikoak sor ditzaketen makinak erabiltzea.

- Su artifizialak, petardoak edota pirotekniako bestelako elementuak erabiltzea, eta barbakoak egitea. Hori guztia, landaguneetan ezezik, hiri-lurzoruetan eta zuhaitz, sastraka edo labore sailetatik 300 metroko baino gutxiagora ere debekatuta egongo da.

- Errekuntzako motordun ibilgailuak ezingo dira erabili baso-pistetan, lursailetako bideetan edota asfaltatutako errepideetatik kanpora geratzen diren gainerako igarobideetan, lanpostura edo ohiko bizilekura joateko ezinbestekoa den kasuetan izan ezik.