Udako isunik ohikoenak. Saihestu daitezke?

Uda iristearekin bat, opor sasoi honetan ez dira falta izaten hondartzara irteerak, paseotxokak, herrietako jaiak... Udako denboraldia deskonektatzeko garaia da,  baina autoa hartzen dugunean askotan ez dugu behar adina arreta jartzen eta erlaxatu egiten gara. Bada, uda honetan, despisteak oso garesti ordain ditzakegu.

Hilabeteotan joan-etorriak areagotu egiten dira, askoz ere festa gehiago izaten dira Euskal Herriko herri eta hirietan, eta, ondorioz, arau-hausteak ere ugaritu egiten dira.

Mario Garcia RAC Vasco Navarroko bozeramailearen hitzetan, udan urte osoko patroia errepikatzen da, hau da, gehiegizko abiadura, distrakzioak (batez ere mugikorra erabiltzeagatik) eta alkohol eta bestelako drogen kontsumoa dira hutsegite ohikoenak. 

Hala ere, badira propio udakoak diren arau-hauste batzuk; txankletekin, oinutsik gidatzea edo oinetako irekiekin gidatzea, adibidez. Jokabide hori Zirkulazioko Erregelamendu Orokorrean zehazki jasota ez badago ere, zigorgarria izan daiteke.

Kamisetarik gabe autoa hartzea ere ohikoa da hilabete bero hauetan, baita ukondoa leihatilatik ateratzea ere. Horrek, baina, gidariaren mugitzeko askatasunari eragin diezaioke. Legeak ez du berariaz debekatzen, baina ohitura horiek Zirkulazioko Erregelamendu Orokorrean jasotako lege batzuen aurkakoak dira; beraz, isuna jarri edo ez, agentearen irizpidearen araberakoa izango da.

Ekipajea gaizki antolatuta eramateak ere zigorra ekar dezake, 500 euro eta 4 punturaino, hain zuzen ere, baita gidatzean makillatzeak ere. Horretan ikusiz gero, 200 euroko isuna jar diezaiokete gidariari, deskuidu larria ekar baitezake.

Udan asko dira zigarro-mutxikina leihatilatik botatzen dutenak ere. Horrek ere zigorra ekar dezake; 500 euroko zehapen ekonomikoa eta 6 puntu galtzea gidabaimenean.

RAC Vasco Navarroko bozeramailearen aburuz, bost zentzumenak erabili behar dira autoa gidatzeko orduan, deskuidurik txikienak ere istripua eragin baitezake. Era berean, arduragabekeriaz gidatzeak gure ekonomiari ere eragin diezaioke, agenteek isuna jartzen badigute.