Konpondu dira errepideetako arazoak Bizkaian, eta zirkulazioa normaltasunera itzuli da
Gaur goizean Bizkaiko errepide nagusietan gertatu diren zenbait istripuk gorabeherak eragin dituzte trafikoan, baina 10:00etarako dena konponduta zegoen eta normaltasuna zen nagusi zirkulazioan.
Malmasingo tunelean (Basauri) bi autok talka egin dute eta ilarak sortu dira Bilboko noranzkoan, Eusko Jaurlaritzako Segurtasun Sailak eitb.eus-i jakinarazi dionez.
Iturriaren arabera, 07:30ean izan da ezbeharra, eta pilaketak sortu dira.
35 minutu geroago, 08:05 aldera, beste bi istripu gertatu dira inguru horretan. Batean lau autok egin dute talka, eta pertsona bat zauritu da; eta bestean, bi ibilgailuren arteko istripua izan da eta pertsona bat zauritu da.
Auto-ilarak bi kilometro eta erdikoak ziren inguru horretan 08:45 aldera, Bilbora bidean.
Bestalde, Derion beste bi autok egin dute talka, eta pertsona bat zauritu da. Hor, Txorierriko errepidean, lau kilometrokoak izan dira auto-ilarak Donostiako noranzkoan.