Familien % 9k soilik jartzen dizkiete adimen artifiziala erabiltzeko mugak seme-alabei

Adimen artifizialari buruzko ikerketa baten arabera, familien % 91k ez diete bere erabilera mugatzen seme-alabei eta % 60 ikastetxeetan erabiltzearen aldekoak dira. Halaber, irakasleen erdiak baino gehiagok (% 56) hezkuntza curriculumean sartzea babesten dute, baina % 42k teknologia horren erabilerari mugak jartzea defendatu dute. Horrez gain, ikasleen % 82k onartu dute inoiz erabili dutela. 

Horiek dira Empantallados.com hezkuntzako plataformak eta GAD3 kontsultorak adimen artifizialaren ondorioen inguruan egindako azterlanaren ondorio nagusiak. Ikerketa egiteko 14 eta 17 urte bitarteko ikasleen 501 guraso, 200 irakasle eta 200 ikasle elkarrizketatu dituzte.

Inkestan parte hartu duten pertsona gehienek onartu dute inoiz zerbait galdetu diotela chatbot edo solasaldi bat egiteko gai den programa informatiko bati. Zehazki, ikasleen % 91k, irakasleen % 86k eta gurasoen % 71k ChatGPTri galderaren bat egin diote.

Ikertzaileek gaur emandako datuen arabera, batez beste, % 33k informazio iturri gisa erabili izan dute, baina ikasleen kasuan portzentajea % 40koa da.

Inkesta parte hartu dutenek, batez beste, 6,2 puntu eman dizkiote tresna horren objektibotasunari eta hamarren bat gehiago, 6,3, egokitasunari. Irakasleen puntuazioak, ostera, ozta-ozta gainditzen du bosteko langa, 5,2 eta 5,4, hurrenez hurren. Dena den, adin txikikoen erdiek baino gehiago adierazi dute adimen artifizialak informazio okerra eman dezakeela.

Bestalde, familia (% 83) eta irakasle gehienak (% 90) kezkatuta daude adimen artifizialeko tresnen pribatutasun politikengatik eta egiten duten datu pertsonalen erabileragatik.