Eliza katolikoak erabateko boterea eman dio Icetari, Belorado, Urduña eta Derioko monasterioak kudeatzeko

Vatikanoak Mario Iceta Burgoseko artzapezpikua 'komisario pontifizio' izendatu du, eta horrek esan nahi du Belorado, Urduña eta Derioko monasterioetan erabateko boterea izango duela, administrazio-, erlijio- eta ondare-erabakiak hartzeko orduan, eremu zibileko legezko ordezkaritza barne, artzapezpikuak berak Burgosko Artzapezpikutzaren egoitzan emandako prentsaurrekoan azaldu duenez. Komentu horiek maiatzaren 13an Eliza katolikotik atera zirela iragarri zuten klaratar mojen komunitatearen parte dira.

Icetak Pablo de Rojas kanporatutako gotzain faltsuari eta Jose Ceacero Pia Union Sancti Pauli Apostoli delakoaren bozeramaileari Beloradoko komentua uzteko eskatu die, zatiketa iragarri zutenetik bertan baitaude.

Izendapenaren berri eman zaio klaratarren komunitateari, azken urteetan abadesa izan den sor Isabeli burofax bat bidalita. Izan ere, dagoeneko ez da abadesa, bere agintaldia amaitu baita, hain zuzen ere asteazken honetan.

Mario Icetak kontrola hartzeak "berehalako ondorioak" ditu, eta, arlo zibileko, fiskaleko eta penaleko zerbitzu juridikoen bulego profesionalen laguntzarekin, Artzapezpikutzak neurri egokiak hartuko ditu Pablo de Rojasek eta Jose Ceacerok alde egitea lortzeko, bai eta erlijio-komunitatea eta ondarea babesteko ere.

"Elizakoak ez diren bi pertsonari esparru katoliko batean daudela gogorarazi behar zaie", esan du, eta edozein erabaki, baita bertatik ateratzeko neurriak hartzea ere, beharrezkoa bada, legearen babesean hartuko lirateke, bulego juridikoen bidez. Hala ere, lehenik eta behin, borondatez ateratzea eskatuko diete.

Kudeaketa-batzordea

Burgosko Artzapezpikuak azaldu duenez, aita santuak egindako izendapenak abadesa ohiari eta monasterioko kontseiluari baino botere handiagoa ematen dio, eskumen guztiekin, baina elkarlanean jarduteko asmoa du, eta horretarako, batzorde kudeatzaile bat izendatu du.

Batzordeko kide dira Arantzazuko Andre Mariaren Federazioko presidentea eta haren idazkari federala, komunitate erlijiosoa zaintzeaz arduratuko direnak; Burgosko Artxidiozesiko bikario judiziala; eta Burgosko Artzapezpikutzako Gai Juridikoetako zuzendaria, alderdi zibilak koordinatuko dituena.

Mario Icetak prentsaurrekoan nabrmendu duenez, "kontuz eta zuhurtziaz jokatu nahi dute", izan ere, helburua mojek "erabakian atzera egitea eta etxera itzultzeko bidea aurkitzea da". "Ez dugu presarik", ziurtatu du, eta ateak zabalik ditu elkarrizketarako, hori baita konponbidea.

Ceacero: "Artzapezpikutza egiten ari dena legez kanpokoa da"

EFE albiste-agentziarekin telefonoz izandako elkarrizketan, Ceacerok baieztatu du klarisekin jarraitzen dutela eta ez dutela jakinarazpen ofizialik jaso, ezta Beloradoko komentua uzteko eskaerarik ere, Icetak eskatu bezala. Gainera, gotzain faltsuaren bozeramaileak esan duenez, "Artzapezpikutza egiten ari dena legez kanpokoa da".

Halaber, EFE agentziak Beloradoko komentura egindako telefono-deiari erantzunez, mojetako batek azaldu du ez dutela adierazpenik egingo, baina komunitatea nola dagoen galdetuta, "Jainkoari eskerrak klaratar guztiak ondo" daudela esan du.