Zuhurtziagabekeriazko giza hilketagatik errudun jo dute Santi Coca hiltzeagatik akusatutako gizona

Santi Cocaren heriotza argitzeko egin den epaiketako herri-epaimahaiak zuhurtziagabekeria larriko giza-hilketaren errudun jo du akusatua. Ostean, epaileak baldintzapeko askatasuna agindu du auzi horrengatik, Fiskaltzak eta herri-akusazioak eskatu duten zigorraren zatirik handiena bete duelako.

Santi Coca ospitalean hil zen, 2019ko apirilaren 26an Donostiako diskoteka baten kanpoaldean jipoia jaso eta bi egunera. Gipuzkoako Auzitegian hilketarekin lotuta egiten ari diren bigarren epaiketa da hau. Lehenengoa egin zenean, orain auzipetu duten gizonezkoa ihes eginda zegoen eta ezin izan zuten epaitu.

Ebazpenak alkoholarekin eta cannabisarekin intoxikatuta egotearen aringarria aplikatu dio akusatuari. Bestetik, Iker Cocari, hildakoaren anaiari, eragindako lesio arinen delitu batengatik ere zigortu dute.

Egun batez eztabaidatzen aritu ondoren eman du epaia herri-epaimahaiak. Akusatuak Santi Cocari "bortizkeriaz kolpeak" eman zizkiola frogatutzat jo du. Hala ere, akusatuak biktima "bizitzearekin bateraezina den arrisku bat sortzeko asmorik ez" zuela ebatzi du, "borroka baten moduan" ikusi zuela gertatutakoa. Gaineratu duenez, akusatuak "erasoa egitea besterik ez zuen buruan", eta "ez zuela hiltzeko aukera egon zitekeenik pentsatu".

Cocaren heriotza eragin zuen garuneko odoljarioari dagokionez, epaimahaiak uste du "kolpeek" eragin ziotela, baina ez akusatuak emandakoek bakarrik, odoljario hura erasoan parte hartu zutenek emandako "edozein kolpek" eragin ahal izan zuelako.

Hori horrela, epaia ezagutarazteko saioan, behin-behineko askatasuna agindu du epaileak auzi horrengatik, Fiskaltzak eta Donostiako udalak egikaritutako herri-akusazioak eskatu duten lau urteko zigorraren zati handiena (2 urte eta 9 hilabete) bete baitu. Hala ere, espetxealdia luzatu daiteke, beste auzi batzuk tarteko. Defentsak, berriz, urtebeteko kartzela-zigorra eskatu du.

Joan zen otsailaren 27an Frantzian atxilotu zutenean, 15 urteko espetxe-zigorra eskatu zuen Fiskaltzak akusatuarentzat "behin-behineko doloarekin egindako giza-hilketa" egotzita. Bestalde, herri-akusazioak 20 urte eskatu zituen hilketagatik. Epaimahaiaren ebazpena ezagutu ondoren, ordea, euren eskaerak berrikusi behar izan dituzte eta zuhurtziagabekeria larriko giza-hilketagatik ezartzen den zigorrik handiena eskatu dute, lau urtekoa.

Alejandro Palacio defentsako abokatuaren ustez, epaimahaia "oso egoki aritu da" bezeroak "ez baitzeukan hiltzeko borondaterik". Bestalde, Iñaki Tina herri-akusazioko abokatuak esan du "zigor handiagoa" nahi zutela, auzipetuek heriotza horrengatik epaitutako gainerakoek baino "zeresan handiagoa" izan zuela uste dutelako.

Bestetik, Fatima Hacine-Bacha, Santi Cocaren ama, prozesu guztiarekin "atsekabetuta" agertu da Radio Euskadin egin dituen adierazpenetan, eta epaia "familiarentzako iraina" dela adierazi du.

Santi Cocaren heriotzaren inguruan egindako lehendabiziko epaiketa 2023ko azaroaren erdialdetik abenduaren hasierara bitartean egin zen. Orduan, lau gazte absolbitu zituzten eta bostgarren bati hiru urte eta erdiko kartzela-zigorra ezarri zioten zuhurtziagabekeriazko giza-hilketagatik; orduan ere, intoxikazio etilikoaren aringarria ezarrita.