Osakidetzak 500 ohe gehiago jarri ditu ospitaleetan, gripe kasuek gora egin dute eta

Urtearen hasierak ospitaleratze kopuruaren gorakada nabarmena ekarri du Euskadin, arnas infekzio akutuak direla eta, hein handi batean gripe kasuen gorakadarekin zerikusia dutenak. Fenomeno hori ohikoa da familia-bileren eta Gabonetako ospakizunen ondoren, eta adinekoei eta gaixotasun kronikoak dituzten pazienteei eragiten die, batez ere. Osakidetzaren aurreikuspenen arabera, aste honetan izango da kutsatze gehien Euskal Autonomia Erkidegoan.

Egoera horren aurrean, Osakidetzak, Euskal Osasun Zerbitzuak, EAEko ospitaleetan 500 ohe gehigarri egokitzea aurreikusten duen kontingentzia plan bat aktibatu du. Pazienteak artatzeko behar gero eta handiagoari aurre egiteko erantzun arin eta eraginkorra bermatzea du helburu.

Osasun agintariek azaldu dutenez, errefortzu hori azken asteetan hartutako beste neurri batzuei gehitzen zaie, hala nola larrialdietan langile gehiago jartzeari eta lehen mailako arretan baliabideak optimizatzeari, sintoma arinak dituzten gaixoak artatzeko eta ospitaleetan kolapsoak saihesteko.

Radio Euskadiri egindako adierazpenetan, Enrique Fernando Peiro Jaurlaritzako Osasun sailburuordeak nabarmendu du aurtengo gripea ez dela aurreko urteetakoa baino "okerragoa". Horrez gain, goia noiz joko duen galdetuta, uste du asteon edo datorren astean izan daitekeela.

__________________

__________________

Ospitaleratzeen areagotzea ez da gripe kasuen gorakadaren ondorio bakarrik, baizik eta baita neguan ohikoak diren beste arnas birus batzuen ondorio ere, hala nola arnas birus sintzitialarena, bereziki adingabeei eragiten diena.

Eusko Jaurlaritzako Osasun Sailak gripearen aurkako txertaketaren garrantzia azpimarratu du, batez ere arrisku taldeei dagokienean: 65 urtetik gorakoak, patologia kronikoak dituzten pertsonak eta osasun langileak. Era berean, eskuen higiene egokia mantentzea eta arnasketa-sintomak izanez gero, pertsona zaurgarriekin kontaktu hurbila saihestea gomendatzen dute.

Osakidetzak kutsatzeen bilakaera monitorizatzen jarraituko du hurrengo asteetan, eta ez du baztertzen neurriak zabaltzea, asistentziaren presioak gora egiten jarraitzen badu.