Gripe kasuek gora egiten jarraitzen dute Hego Euskal Herrian

Osakidetzak egiaztatu duenez, gripearen birusaren zirkulazioak gora egiten jarraitzen du. Covid-19aren kasuen kopuruak, aldiz, egonkor jarraitzen du, balio txikietan. Arnas Infekzio Akutuaren (AIA) Zaintzari buruzko azken txostenaren arabera (2024ko abenduaren 30etik 2025eko urtarrilaren 5era), arnas infekzio mota horren tasa 505,6 kasukoa izan da 100.000 biztanleko, eta aurreko astean, berriz, 461,4 kasu izan ziren 100.000 biztanleko.

Nolanahi ere, kontuan izan behar da txostenak aipatzen duen astean jaieguna izan zela, eta horrek eragin nabarmena duela datuen baliozkotasunean, batez ere lehen mailako arretan lortutakoetan.

Osakidetzako ospitale-sareko AIA larriaren tasa 29,4 kasukoa izan da 100.000 biztanleko (19,0/100.000 aurreko astean). Aste honetan 786 gripe-birus, 261 arnas-birus sintzitial eta 27 SARS-CoV-2 erregistratu dira EAEko Informazio Mikrobiologikoko Sisteman.

Lurralde historikoen arabera, tasa hauek izan dira: Araban, 100.000 biztanleko 396,6 kasu; Bizkaian, 100.000 biztanleko, 500,8; eta Gipuzkoan, 100.000 biztanleko, 563,7.

Adin-taldeen arabera, tasarik altuena urtebetetik beherakoen taldean erregistratu da, 100.000 biztanleko 4.086,0 kasurekin, eta ondoren 1-4 urteko eta 64 urtetik gorako taldeak daude, 100.000 biztanleko 1.335,1 eta 557,7 kasurekin, hurrenez hurren.

AIA edo AIAL (arnas infekzio akutu larria) kasu larritzat hartzen dira Osakidetzako ospitale-sarean sartu behar direnak. Kasu honetan, AIAL tasa 29,4 kasukoa izan da 100.000 biztanleko (19,0/100.000 aurreko astean).

Adin-taldeen arabera, tasarik altuena urtebetetik beherakoen taldean erregistratu da (140,4 kasu 100.000 biztanleko), ondoren 64 urtetik gorakoen taldean eta 1-4 urte bitartekoen taldean (93,6 eta 24,0 kasu 100.000 biztanleko, hurrenez hurren).

Gripearen kode diagnostikoekin erregistratutako ospitaleratzeen tasa 8,0 izan da 100.000 biztanleko (3,2/100.000 aurreko astean), ABS kodeekin ospitaleratutakoen tasa 2,5 izan da 100.000 biztanleko (1,6/100.000 aurreko astean), eta covid-19 kodea duen tasa 0,4 izan da 100.000 biztanleko (0,1/100.000 aurreko astean).

Intentsitate ertaina eta goranzko joera Nafarroan

Nafarroak, bestalde, A eta B gripeen zirkulazio epidemikoari eutsi dio urtarrileko lehen astean, intentsitate ertainarekin eta goranzko joerarekin; guztira 57 ospitaleratze izan dira.

Lehen mailako arretako arnas infekzio akutuen tasa 898 kasukoa izan zen 100.000 biztanleko.

Bestalde, iturriek ohartarazi dute azken asteetan barizelaren birusaren zirkulazioa detektatu dela. Barizelak, batik bat, txertoa hartu ez duten eta gaixotasuna izan ez duten pertsonei eragin die.

Horri dagokionez, adierazi dute barizela arina izan ohi dela haurtzaroan, baina helduek maizago pairatzen dituzte kasu larriak.