Lekuko batek ziurtatu du surfeko begiralea adingabe bati ukituak egiten ikusi zuela

Gizonezko batek ostiral honetan ziurtatu duenez, hamaika ikasleri sexu-erasoa egiteagatik akusatutako surf monitorea 2019ko irailean Irungo kale batean adingabe bati ipurmasailetan ukituak egiten ikusi zuen, gertuko museo bateko leihotik. 

Gizon horrek segurtasun osoz identifikatu du akusatua, bera ere surflaria baita, eta argi eta garbi kokatu du gertakari hori 2019ko iraileko lehen asteko ostegunean. Egun horretan, aipatu museora joan zen, eta bertatik ikusi zuen kalean erruztatuaren furgoneta.

Gogoratu du ibilgailuaren aurrealdean adingabe talde bat zegoela mugikorrekin, eta furgonetaren atzealdean, atea gorantz igota zela, begiralea ikusi zuela eskuak nerabe baten praken azpitik sartuta, ipurmasailei eusten, eta adingabea burumakur. 

Egoera horrek minutu batzuk iraun zuela esan du, horrek atentzioa eman ziola, eta etxera itzultzean emaztearekin hitz egin zuela horretaz. Une hartan, ordea, esan duenez, ez zuen ezer esan, argazkirik ez zuelako, eta bata bestearen kontrako akusazio gisa geldituko zela uste zuelako. "Agian orain beste zerbait egingo nukeen", adierazi du.

290 urteko espetxealdia

Testigantza hori izan da astelehenetik Gipuzkoako Auzitegian Hondarribiko surf monitore horren aurka egiten ari diren epaiketaren bosgarren eguneko nabarmenena. Fiskaltzak 85 urteko kartzela-zigorra eskatzen du auzipetuarentzat, 2011 eta 2021 artean izandako gertakari batzuengatik; akusazio partikularrak, 290 urteko espetxe-zigorra, eta defentsak, bere aldetik, absoluzioa.

Gaurko saioan, lau saio ateak itxita egin ondoren jendaurreko entzunaldian egin den lehenengoan, akusatuaren amak ere deklaratu du. Horren hitzetan, berak ez du inoiz susmorik izan, nahiz eta batzuetan adingabe batzuk bere etxera joaten ziren auzipetuaren logelan bideoak ikustera.

Begiralearekin bizi zen emakume horrek esan du bere semeak ikasle asko zituela, oso maitatua zela haien artean, eta batzuk batzuetan taldean geratzen zirela etxean surf bideoak ikusten arratsalde-pasa, semeak telebista bat, ordenagailu bat eta nahasketa-mahai bat baitzituen bere logelan.

Onartu du batzuetan ikasle batzuk bakarrik joaten zirela etxera, baina ukatu egin du inoiz semea haur erdi biluzi batekin gelan harrapatu izana. Horren arabera, hori "sekulako gezurra da", horrelako zerbait ikusi izan balu moztu egingo zukeelako, are gehiago kontuan hartuta bilobak etxera joaten zitzaizkiola astebururo. 

Ez zuten salatu nahi

Halaber, kasuaren ikerketan parte hartu zuten Ertzaintzako hiru agentek ere hitz egin dute epaiketan. Bertan azaldu dutenez, hasiera batean biktimek ez zuten salaketa jarri nahi, ez zietela sinetsiko uste baitzuten, eta ondorioen beldur baitziren. Hala ere, azkenean, babestuta egongo zirela azaldu zietenean, salaketa jartzea erabaki zuten.

Polizia horiek adierazi dute "erabateko sinesgarritasuna" eman zietela adingabeek emandako testigantzei, eta, horien esanetan, auzipetuak "modus operandi" bat zuen, "luzaroan" garatua: surf eskoletan eta antolatzen zituen kanpalekuetan ikasleak berezi sentiarazten zituen, haien konfiantza bereganatzeko, eta haientzat erreferente bihurtzen zen.

Halaber, jakinarazi dutenez, auzipetuaren etxean haur-pornografiako 4.200 irudi inguru aurkitu zituzten, mutiko biluzienak gehienak.

Bestalde, surfeko taulak konpontzeko tailer bat duen eta akusatuaren ikasle ziren hainbat mutili ingeleseko eskolak ematen zizkien gizon batek adierazi duenez, adingabe horietako batek behin izandako "ezohiko portaerak" atentzioa eman zion, "oso isilik eta itzalita" egon baitzen, "normalean aldarte onean egon ohi zenean". Berari, baina, inoiz inork ez ziola ezer kontatu gaineratu du.

Epaiketak astelehenean jarraituko du, lekuko gehiagoren deklarazioekin.