Andre Maria Zuriaren jaiek badute kartela

2025eko Andre Maria Zuriaren jaiak abuztuaren 4tik 9ra ospatuko dira, eta jai-giroa hasteko 46 egun falta direnean, kartel irabazlea aurkeztu dute: 'Guztion jaiak, guztiontzat', Gasteizko bizilaguna den Ania Saénz de Buruaga Fernández de Gobeorek egindakoa.

Lehiaketaren edizio honetan 57 artistek aurkeztu zituzten euren dosierrak. Hautaketa prozesua bi fasetan egin zen: lehenengoan, Arabako bost diseinuko profesionalek osatutako epaimahai batek bost finalista aukeratu zituen, eta 500 bana euro jaso zuten, kartela egiteko. 

Bigarren etapan, bost hautatuek egindako kartelak baloratu zituzten. Horien artean, azkenean, Saenz de Buruagaren proposamena aukeratu zuten, eta 2.000 euroko saria jasoko du.

Aurkezpenean, egileak aitortu du sortze-prozesua hastean "jende anitzez betetako kaleak" zituela jaietako irudi adierazgarriena bezala. Baina finalista zela jakindakoan, Andre Maria Zuriaren jaiek benetan definitzen dutena islatzearen alde egin zuen: ospakizun irekia, partekatua eta herritar guztien ordezkari dena.