Kontrolpean dute Gasteizko LEA fabrikan piztutako sutea

Sutea piztu da Gasteizen, LEA higiene pertsonaleko produktuen fabrikan, eta ke-zutabe handia eragin du, Arabako hiriburu osotik ikusteko modukoa. LEA fabrikako eta Gamarrako industrialdeko beste enpresetako langileak bertatik irtenarazi dituzte, eta ez da inor zauritu.

Sutea 13:45ean hasi da, eta ke-zutabe bero eta oso altua eragin du. Haizeak ipar-ekialderantz eraman du.

Sua kontrolpean hartu dute, eta ez omen da zabalduko. Hala ere, "denbora beharko da" erabat itzaltzeko, Udalak jakinarazi duenez.

Joana Egiluz Babes Zibileko sailburuordeak Radio Euskadin azpimarratu duenez, sua kontrolatzeak "ez du esan nahi suhiltzaileen lana amaitu denik", oraindik "gau luzea" baitute aurretik sutea itzaltzeko. Gauean zehar itzaltzea espero dute, baina baliteke egun batzuk behar izatea erabat amatatzeko.

Keak kaltetutako bizilagun guztiei etxeko leihoak eta ateak itxita izateko eskatu die Udalak; izan ere, ke-zutabeak Lakuarako bidea hartu du.

Hasiera batean beste estrategia bat erabili duten arren, segurtasunagatik, suhiltzaileak sua itzaltzen hasi dira eta kea nabarmen gutxitu da.

Udalaren arabera, sua hartu duen materiala substantzia koipetsu bat da (olioak eta garbitzeko produktuak), eta ez darama partikula solidorik airean; gainera, berez desegingo da, eta ez da babes-neurri berezirik beharko.

Arabako suhiltzaile guztiak ari dira lanean garrak fabrikan dauden oxigeno biltegietara zabal ez daitezen. Hala ere, sua "istripuaren nukleotik gertuko hidrogenozko botilak kontsumitzen ari da". Botila horien deflagrazioen ondorioz, suhiltzaileek atzera egin behar izan dute, eta suari ondoko lursailetatik aurre egitea erabaki dute.

Udala airearen kalitatea aztertzen ari da une oro.

Langilerik ez dela zauritu nabarmendu du LEAk

Enpresak ohar batean esan duenez, oraindik ez dakite zerk eragin duen sutea, eta ikertzen ari dira. Hasiera batean, produktu kimikoak zeramatzan zisterna-kamioi bat aipatu dute Udaleko iturriek.

LEAk nabarmendu du arin abisatu diela larrialdi zerbitzuei, eta barne protokoloen eraginkortasuna goraipatu du, horiei esker ez delako inor zauritu.

Hala ere, kalte materialak "handiak" dira, horren esanetan. "Suhiltzaileen lanak amaitu arte itxaron beharko da kalte osoa ezagutzeko", gehitu du LEAk.

Higiene-produktuen enpresaren arabera, suteak ez du eraginik izango epe laburreko banaketetan.

Langileen ustez, suak dena erreko du

Ana Esther Condek 20 urtetik gora daramatza LEAn lanean. Gaur bere lanpostua utzi behar izan du, eta shock egoeran dago.

Abetxuku eta Arriaga auzoetako biztanleak etxetik irten daitezke

Hasiera batean, Gasteizko Udalak etxetik ez ateratzeko eskatu die Abetxuku eta Arriaga auzoetako bizilagunei. Gainera, Gamarrako industrialdeko enpresak jendez hustu dituzte. 2.000 metro koadro inguruko industrialdea da.

Gainera, momentu batez, Aramangelu kaleko bizilagunak Arriaga Gizarte Etxera eraman dituzte, baina etxera itzul daitezke jada. Normaltasuna itzuli da ingurura. Hala ere, Babes Zibileko sailburuordeak "zentzuz" jokatzeko eskatu du, ez baita gomendagarria sutea izan den tokira hurbiltzea.

18:00ak inguruan, Udalak baimena eman die berriro Abetxuku auzoko biztanleei etxera itzultzeko, eta Agirrelandako igarobidea ireki dute. Zadorrako etorbideak eta Arriagako ateak, ordea, Leako fabrikatik hurbil, itxita jarraitzen dute.

Hala erabaki du Gasteizko Udaleko Krisi Mahaiak. Arratsaldeko lehen orduan bildu dira, besteak beste, Maider Etxebarria alkatea, Cesar Fernandez de Landa Segurtasun zinegotzia eta beste hainbat sailetako arduradunak.

Ezbeharraren ondorioz, Gasteizko autobusak ez dira normaltasunez ibili. Tranbiarik ere ez da izan Honduras eta Abetxuku geltokien artean. Gauean berreskuratu du normaltasuna, baina ez da Artapadura geltokian gelditzen.