Nico Williamsen irudia ezabatu dute ezezagunek, Barakaldon margotu zieten muraletik

Nico Williams Athleticeko futbol jokalariaren irudia desagertu egin da gaur goizaldean Barakaldoko Lutxana auzoan zegoen muraletik. Bertan, Iñaki anaia, Iker Muniain eta Oscar de Marcos ere agertzen dira. Orain, Nico Williamsen irudia zegoen tokian, esaldi bat irakur daiteke, letra zuriz idatzia: "Joan edo geratu, errespetua galdu duzu".

Carlos Lopez kaleko artistak 2024ko martxoan margotu zuen murala, Athleticek Sevillan, La Cartujan, Errege Kopa irabazi ondoren. Orain, Nico Williams Bartzelona CFtik fitxatzeko aukera ezagutzera eman denean gertatu da erasoa. 

Radio Bilbaon egindako elkarrizketa batean, Carlos Lopezek publikoki deitoratu du bere lanak jasan duen erasoa eta bere borondatez, inoren eskaririk gabe, egin zuela gogoratu du: "Ez Athleticek, ez Williamsek, ez inork, ez dit dirurik ordaindu eta ez dit muralaren margoketa finantzatu. Nire poltsikotik, neure gogotik atera zen, margotu nahi nuelako".  

Artistak azpimarratu du bere ekimena "erabat desinteresatua" izan zela eta Barakaldoko bizilagunei eskaini ziela: "Jendearentzat zen, goza zezaten. Ez dut inoiz ez Athleticen ez beste inoren errekonozimendurik eskatu", azpimarratu du.

Ekintza bandalikoari dagokionez, Lopezek uste du "norbait oso frustratuta dagoela Nico joan egingo dela uste duelako; hori bere kontua izango da, baina ez dakit nire lanak zer zerikusi duen".

Gainera, haserre agertu da, gaur egun desadostasuna adierazteko modu asko daudenean, sare sozialen bidez, esate baterako, "norbaitek nire lanaren gainetik pasatzea erabaki duelako".

Murala zaharberrituko edo aldatuko ote duen galdetuta, artistak azaldu du erabakia ez dela berea bakarrik, horma, berez, enpresa batena baita. "Ez dakit zer egingo dudan oraindik. Izan ere, bat-batean zurekin zerikusirik ez duen ekintza batek zerbait egitera baldintzatzen zaitu", deitoratu du Lopezek, eta gaineratu du ez duela baztertzen murala bera estaltzea edota Nicoren aurpegia zegoen tokian beste jokalari baten aurpegia jartzea, nahiz eta horrek "jatorrizko obraren zentzua aldatuko lukeela" sentitzen duen.

Athleticen erreakzioa

Nikoren anaiak, Iñaki Williamsek, bere X-ko kontuan idatzi duenez, "errespetu falta anonimo baten atzean, beti dago aurpegia emateko txikiegia den norbait "

Athletic taldeak ere oharra plazaratu du X sarean, ondorengoa esanez: "𝗔𝘁𝗵𝗹𝗲𝘁𝗶𝗰 𝗱𝗲𝗳𝗲𝗻𝗱𝗮𝘁𝘇𝗲𝗮 𝗲𝗿𝗿𝗲𝘀𝗽𝗲𝘁𝘂𝘇 𝗷𝗼𝗸𝗮𝘁𝘇𝗲𝗮 𝗱𝗮. Klub baten duintasuna bere balioekiko koherentzian eta beretarrak babesteko moduan ere islatzen da. Horregatik, Carlos Lopezen muraletik Nico Williamsen irudia ezabatu dutenek ez dute Athletic ordezkatzen".