Gizon baten gorpua aurkitu dute Urumea ibaian

55 urteko gizon baten gorpua agertu da ostiral honetan Urumea ibaian, Maria Cristina hotelaren parean, Donostiako Udalak jakitera eman duenez. Jaiotzez Iruñekoa zen.

Udaltzainak eta suhiltzaileak bertaratu dira, eta gorpua berreskuratu eta Agirre Lehendakariaren zubiaren parean dagoen arrapalara eraman dute.

Ez dakite zer gertatu den, eta, hori dela eta, ikerketa abiatu dute gertatutakoaren inguruko xehetasun guztiak ahalik eta azkarren argitzeko.

Haren familiak duela bi egun salatu zuen desagerpena. Lehen behaketaren arabera, gorpuak "ez du indarkeria zantzurik", baina autopsiak argituko du heriotza zerk eragin duen.