Euskadin, hildakoen batez besteko adina 81,7 urtekoa da

Euskadin iaz hildakoen batez besteko adina 81,7 urtekoa izan zen. Azken 10 urteetan 2,4 urte igo da batezbestekoa, eta nabarmentzekoa da emakumeen artean (84,9) altuagoa dela gizonen artean baino (78,3).

Euskal Estatistika Erakundeak, Eustatek, asteartean jakinarazi du 2024an 22.392 heriotza zenbatu zirela Euskal Autonomia Erkidegoan, 2023an baino % 0,4 gehiago. 

11.403 emakume hil ziren, eta 10.989 gizonezko. Argitaratu berri den txostenaren arabera, uztailean izan ziren heriotza gehien. Guztira, 1.854 lagun hil ziren, aurreko urteko hilabete berarekin alderatuta, % 15,9 gehiago. 

Inkestaren datu nabarmenetako bat da duela hamar urte hil zirenen batez besteko adina 79,3 urtekoa izatetik 81,7 urtekoa izatera igaro dela 2024an, hau da, 2,1 urteko koska egin da gora azken hamarkadan. 

Gizonezkoak, batez beste, 78,3 urterekin hil ziren, eta emakumeak 84,9 urterekin; 2014an, berriz, batezbesteko adinak 76,2 eta 82,6 urte izan ziren, hurrenez hurren. Gauzak horrela, esan daiteke azken 10 urteetan, gizonen batez besteko heriotza-adina 2,1 urte igo dela, eta, emakumeena 2,3 urte.

Araban izan da datuen arteko alderik handiena, 2023an baino % 3,8 heriotza gehiago zenbatu baitziren iaz, guztira 3.026 heriotza. Atzetik du Bizkaia, 12.041 heriotzarekin (% 1,3 gehiago) eta Gipuzkoa, 7.325 heriotzarekin, (% 2,5 gutxiago).

Haurren heriotzei dagokienez, Euskadin urtebetetik beherako 26 haur hil ziren iaz, gehienak (16) jaio eta lehendabiziko 28 egunetan. Urtebetez azpikoen kasuan, mutil gehiago hil ziren (% 61,5) neskak baino. 

Gainera, 545 pertsona hil ziren 100 urte edo gehiago zituztela; horietatik % 84,2, emakumeak.

Argitalpenaren beste datu nabarmen bat da hazkunde begetatiboa negatiboa izan zela Euskadin, jaiotzak baino 9.455 heriotza gehiago izan baitziren. Lurraldeka, 5.620 biztanle gutxiago izan zen Bizkaian, 2.903 gutxiago Gipuzkoan, eta 932 gutxiago, Araban.

Heriotzen zergatiei dagokienez, ia herena tumoreek eragin zituzten; zehazki, 6.212 pertsona. Ondoren, zirkulazio-sistemako gaixotasunek eragin zituzten heriotzak (% 25,5, 5.716 heriotza), eta atzetik daude buru-nahasteek eta portaerek eragindakoak eta arnas-sistemako gaixotasunek eragindakoak.

Sexuen artean aldeak izan ziren heriotzen kausei dagokienez; izan ere, gizonen artean, tumoreak zirkulazio-aparatuko gaixotasunak baino gehiago izan ziren; emakumeen artean, berriz, zirkulazio-sistemako gaixotasunak izan ziren heriotza-kausa nagusia eta tumoreak, berriz, bigarrena.