Gripearen kontrako 1.500 dositik gora jarri dituzte Bilboko txertaketa gune handiaren lehenengo egunean

Gripearen kontrako 1.579 txerto (1.409 75 urtetik beherakoei eta 170 nagusiei) jarri dituzte Bilboko Casilla pabiloian dagoen txertaketa gune handiaren lehenengo egunean. Azken astean Bizkaian kasuen kopuruak nabarmen gora egin duelako hartu du 'txertodromo' bat irekitzeko erabakia Eusko Jaurlaritzak. 

Orain-ek egiaztatu duenez, jendetza gerturatu da txertaketa zentrora, eta ilara luzeak eratu dira. Ordu erdiko itxaronaldia egin behar izan dute herritarrek une batzuetan txertoa jasotzeko. Egunaren bukaeran ere ilara luzea egon denez, segurtasun langile batek txertaketa prozesua bukatutzat eman behar izan du, jende gehiago ilaran ez jartzeko.

Osasun sailak jakinarazi duenez, 14 urtetik gorako bizkaitarrek izango dute txertaketa gune horretara joateko aukera. Astelehenetik igandera egongo da zabalik, 08:00etatik 20:00etara, gutxienez bi astez, eta txertoa hartzeko ez da aurrez hitzordua eskatu behar.

Bertan, egunean 1.000 txerto jartzea aurreikusten du Osakidetzak; izan ere,  kutsatutakoak bikoiztu egin dira Bizkaian, azken urteetako datuekin alderatuta.

Txertodromo horrekin herritarren immunizazioa bizkortu nahi dute, arnasketa-gaixotasun horren intzidentzia aurreko kanpainekin alderatuta aurreratuko delakoan, ospitaleetan eta larrialdi-zerbitzuetan antzeman den bezala, bereziki Bizkaian.

Urriaren 13tik 19ra (2025-2026 kanpainako 42. astea) bildutako asistentzia-datuen arabera, 506 gripe kasu identifikatu dira, iaz aldi berean 166 kasu eta duela bi urte 105 kasu zenbatu ziren arren.

Guztira, kanpainaren lehen hiru asteetan 1.120 kasu zenbatu dira, aurreko kanpainen bikoitza baino gehiago. Igoera horrek iradokitzen du gripea lehenago iritsi dela aurten, eta kutsatzeen kurba aurreratzen ari dela.

Ospitaleetan ere gripeak izandako eragina ere jaso dute. Aztertutako astean 45 ospitaleratze jakinarazi ziren, aurreko urteetan 5 eta 6 izan ostean.

Orain arte, guztira 131 kutsatu ospitaleratu dituzte, baina aurreko kanpainetan azaroaren amaierara arte ez zen kopuru hori lortu.

Zainketa intentsiboetako unitateetan hartutako gaixoen kopuruak ere gorakada txiki bat izan du: gripearekin lotuta, 6 kasu izan dituzte baina gaur egun  pertsona bakar batek jarraitzen du zainketa intentsiboetan Bizkaian.

Datuak lurraldez lurralde aztertuta, Bizkaiak du intzidentziarik handiena, 100.000 biztanleko 74,35 kasu zenbatu baitituzte, eta Gipuzkoa (32,10) eta Araba (9,85) ageri dira ondoren sailkapen horretan.

Intzidentzia datuak aintzat hartuta, momentuz Bizkaian soilik ireki du Osakidetzak txertatzeko gune handi bat. Hala ere, beharko balitz, Araban eta Gipuzkoan ere irekiko dira.