GIB diagnostiko berri gehienak gizonezkoetan ematen dira Hego Euskal Herrian, eta batez besteko adina 37 urtekoa da

Gaur egun, 6.200 pertsona inguruk jasotzen dute GIBaren aurkako tratamenduren bat Euskal Autonomia Erkidegoan, abenduaren 1ean ospatuko den HIESaren mundu egunaren harira Osasun Sailak zabaldutako informazioaren arabera. Tratamenduak birusa erabat ezabatzen ez badu ere, ugalketa blokeatzen du eta birusak organismoan aurrera egitea eragozten du.

Oskar Ayerdi Osakidetzako Hiesaren Planaren koordinatzaileak azpimarratu duenez, "tratamendu antirretrobirala jasotzen duten eta GIBaren birus-karga detektaezina duten pertsonek ez dute birusa transmititzen; aurrerapen zientifiko handia da, eta eragin prebentibo eta sozial handia ere badu". "Mezuak argia izan behar du: detektaezina bada, transmitiezina da", gehitu du. 

Urtero 125 GIB kasu inguru detektatzen dira EAEn. Diagnostiko berri gehienak gizonetan gertatzen dira, eta diagnostikatutako pertsona guztien batez besteko adina 37 urtekoa da. 2024an, kasuen % 63,2 Bizkaian detektatu ziren, % 21,6 Gipuzkoan eta % 15,2 Araban.

Kasuen ia erdiak berandu diagnostikatzen dira eta ildo horretan Osakidetzak azpimarratu du diagnostiko eta tratamendu goiztiarra funtsezkoa direla bizikalitate ona lortzeko. 

GIBa hautemateko probak

Osakidetzak GIBa hautemateko probak doan egiten ditu bere osasun zentroetan, erreferentziazko familiako medikuarekin zita eskatuta; edo sexu-transmisiozko infekzioen (STI) kontsultetan.  

Gainera, EAEko 60 farmaziatan GIBaren proba azkarra egin baitaiteke, modu anonimoan, eta bost euro ordainduta. Era berean, GIBaren proba azkarra eskatzeko beste aukera bat erakunde komunitarioak dira.

Osasun Saila eta Osakidetza lankidetzan ari dira beste eragile batzuekin, hala nola hezkuntza eragileekin eta gaixoen elkarteekin, prebentzioaren garrantzia azpimarratzeko, bereziki gazteen eta nerabeen artean.

Nafarroan infekzioek ez dute gora egin

GIB kasu berrien kopuruak ez du ez gora ez behera egin Nafarroan.

Ordea, igo egin da birus hori duten pertsonen kopurua. Nolanahi dela, birusa dutenen artean hazi egin da bizirik irauteko itxaropena, erretrobirusen aurkako tratamenduei esker.

Hiesaren Egunaren kariaz, Osasun Departamentuak berretsi du garrantzitsua dela herritarrak sexu transmisioko gaixotasunez ohartarztea, bai eta GIBaren diagnostiko goiztiarra egitea ere.

Izan ere, hiru diagnostiko berritik bat 35 urtez azpikoen artean ematen da. 

Guztira, 18 infekzio berri antzeman dituzte 2025eko urtarriletik irailera (iaz 20 izan ziren denbora tarte berean). 2024an, bestalde, 33 kasu berri detektatu zituzten.

Gizonezkoen arteko sexu harremanen bidez kutsatu ziren kasu berri horien % 56, eta praktika heterosexualen ondorioz % 40.

Batez besteko adinari dagokionez, 37,4 urtekoa izan zen, 4 eta 64 urte bitarteko pertsonen tartean.

Bestalde, gizonezkoen artean eman ziren kasu berri gehienak; % 85, hain zuzen ere. 

Lore eskaintza Donostian

Donostiako Udalak eta Acasgi, Gehitu eta Harribeltza elkarteek lore eskaintza egingo dute Donostian astelehen honetan, HIESA duten pertsonen alde.

12:00etan izango da ekitaldia Teresa de Calcuta plazan.