Zestoako sei herritar salatu dituen gizonezkoak epailearen aurrean esan du "bizitza hondatu"diotela auzipetuek

Gipuzkoako Lurralde Auzitegian gaur hasi da Zestoako sei herritarren aurkako epaiketa, gizonezko baten integritate moralaren aurkako delitua egitea leporatuta. Auzipetuak dira gizonaren bikotekide ohia eta hura babestu zuten Zestoako bizilagunak, tartean, Mikel Arregi, alkatea —epaituko dituzten gertakariak izan zirenean zinegotzia zen—.

2016 eta 2018. urteen artean izan ziren salatutako gertakariak, eta banaketa prozesuan zegoen Zestoako bikote bateko gizona da salatzailea. Bere akusazioaren arabera, bikotekide ohiak eta herriko beste bost pertsonak jazarri eta presionatu egin zuten, semearen zaintza partekatuari uko egin ziezaion, eta bere kontrako kontzentrazioak eta bestelako ekintzak egin zituzten, emakumeari tratu txarrak ematen zizkiola esanez.

Gaurko deklarazioan, salatzaileak esan du sei auzipetuek bere kontrako desprestigio kanpaina bat  jarri zutela abian. Besteak beste, esan du alkoholiko, drogazale eta txatu-txar emaile izatea egotzi ziotela, salaketarik inoiz jarri ez bazen ere. Halaber, kontatu du auzipetuta daudenetako lauk "presio taldea" osatu zutela, eta bere bikotekide ohiari laguntzen ziotela, haurra jasotzera zihoanean; une horietan gizona iraintzen zutela esan du. 

Bestalde, azaldu du elkarretaratzeak antolatu zituztela, horietako bat, umearen zaintza erabaki behar zuten egunean Azpeitiko Epaitegian, "Zurekin gaude" lelopean. 

Zestoako alkateari, berriz, leporatu dio bilera batera deitu zuela, eta eskatu ziola bikotekide ohiak esandakoa onartzeko, bestela lanpostutik baztertu egingo zuela esanez. Zestoako Udaleko langilea da salatzailea. 

Gertakariok bizitza hondatu diotela gaineratu du gizonezkoak; Zestoan ezin duela lasai ibili, eta tratamendu psikologikoan dagoela ziurtatu du. 

Aipatutako horiek, fiskalaren eta bere abokatuaren galderei erantzunez esan ditu. Defentsaren itaunei erantzunez, berriz, zalantza gehiago agertu ditu eta erantzunak ez dira hain argiak izan. Zehaztu du irainak akusatuetako batek egin zizkiola behin, "atzeratu" deituta, eta Azpeitian egin zen protesta-bilkura nork deitu zuen ez dakiela dio.

Akusatzailearen lekukoek ere gaur deklaratu dute, eta bihartik aurrera, defentsaren lekukoen eta sei auzipetuen txanda izango da. Azken horiek ostegunean deklaratzea aurreikusten da. Denentzat lau eta bost urte arteko kartzela-zigorra eta 30.000 euroko kalte ordaina eskatzen ditu akusazioak. Defentsak, absoluzioa. 

Auzipetuei babesa

Gaur, epaitegiaren aurrean sei akusatuei babesa adierazteko elkarretaratzea egin dute, Zestoako Mugimendu Feministak deituta. "Sinestezina iruditzen zaigu. Kasu honek argi uzten du sistema judiziala heteropatriarkala dela", esan du Maddi Lertxundik, bildutakoen izenean.

Epaiketa honetatik akusatuak "zigortuak ateratzeak aurrekaria" ezarri dezakeela ere adierazi du. "Lagun bati laguntzea arriskutsua izan daitekeela eta ekintza hori kriminalizatu daitekeela helarazi nahi dute".  

Mugimendu Feministaren arabera, "elkartasun feminista" da epaitzen ari direna.