Dagoeneko 46 dira Adamuzko tren istripuan hildako pertsonak

Kordobako Reina Sofia Ospitaleko zainketa intentsiboetako unitatean zegoen emakume baten heriotza kontutan hartuta, 46 pertsona hil dira Adamuzen (Kordoba) urtarrilaren 18an izandako tren-istripuan, Andaluziako Juntako iturriek Eferi jakinarazi diotenez.

Guardia Zibilak amaitu du Adamuzeko tren-istripua gertatu zen tokian egin beharreko ikerketa lanak eta lehen atestatua utzi du istripuaren arrazoiak ikertzen ari diren epaitegietan. Txostenak agenteek bildutako ebidentzien inbentario bat jasotzen du, 'zero-guneko' 2.500 argazki inguru, trenen bi kutxa beltzak eta hainbat pertsonan deklarazioak, tartean, Iryo ontziko makinistarena.

Kataluniako Generalitateak, Adifek, Renfek eta tren-gidarien sindikatuak adostu dute trebideetan segurtasuna bermatzeko ezohiko azterkteak egingo dituztela zerbitzua berrezarri aurretik. Azterketa horiek egiten hasita daude dagoeneko, baina Kataluniako Garraio kontseilari Silvia Panequek ezin izan du argitu noiz hasiko diren berriz ere zerbitzua ematen.

Igandean istripua izan zen lekuan lanean ari diren larrialdietako zerbitzuek falta ziren bi pertsonen gorpuak aurkitu dituzte gaur goizean. 

Aurkeztutako salaketen arabera, 45 ziren desagertuak, eta beraz, ez dute espero trenaren hondakinetan beste inor aurkitzea.

Ostegun honetan egin dira Adamuzeko (Kordoba) istripuan hildakoen aldeko lehen hileta-elizkizunak eta agur-ekitaldiak.

Isiltasuna, sostengua eta elkartasuna izan dira nagusi ekitaldi hauetan. Senideek alboan izan dituzte herritarrak eta baita politikako eta gizarteko hainbat alorretako ordezkariak ere.

Montoroko (Kordoba) epaitegiko bi magistratuk batera ikertuko dituzte istripuaren arrazoiak.

Andaluziako Justizia Auzitegi Nagusiko presidentearen arabera, "ikerketa konplexu eta luzea izango da, eta adierazpen asko hartuko dira".

Oraingoz, 9 partikularrek jarri dute salaketa, eta 7 erakundek eskatu dute auzian pertsonatzea.

Pasa den igandean Kordobako Adamuz herrian gertaturiko tren istripua argitzeko ikerketak aurrera jarraitzen du. Oscar Puente Espainiako Garraio ministroak irrati kate bati eskaini dion elkarrizketa batean azaldu duenez, ezbeharra izan zuen Iryo trenak markak ditu azpialdean eta baita aurretik toki horretatik igaro ziren beste bi trenek ere. 

Gutxienez bost pertsona zauritu dira ostegun honetan Cartagenan, FEVE tren konpainiaren tren batek eta garabi batek Alumbres udalerrian (Cartagena) talka egin ostean, Osasun Departamentuak zabaldutako informazioaren arabera. 

Oscar Puente Espainiako Gobernuko Garraio ministroak adierazi duenez, igandean Adamuzen (Kordoba) izandako tren-istripuaren erantzuleek erantzukizuna hartuko dute, "egiteagatik edo ez egiteagatik".

Copen egindako elkarrizketa batean, dimisioa aurkeztuko ote duen galdetuta, erantzun du bere buruaz pentsatzeko "minutu" bat ere ez duela izan, astelehen gauean Adamuzen istripua gertatu ondoren etxera iritsi zenean Rodaliesena gertatu baitzen.

Hori esanda, argi utzi du erantzuleek bere gain hartuko dutela gertatutakoaren ardura: "Nornahi dela ere" "Erantzukizunak, premisa horretatik abiatuko dira", gaineratu du.

Kataluniako Rodaliesen sare osoa geldirik egon da gaur, Gedaliesen gertatutako istripuaren ondoren. Horrek, trena egunero erabiltzen duten 400.000 lagunei eragin die eta kaosa eragin du garraio publikoan. Bihar trenak normaltasunera itzuliko dira, baina euste-horma erori zen AP-7 autobidearen zati bat itxita egongo da konponketak egin arte.

Oscar Puente ministroak jakinarazi du euste-horma R4 lineako trena pasatzen ari zen unean bertan erori zela, kabinan zeuden makinistetako baten heriotza eraginez. Arrazoiei buruz galdetu diotenean, onartu du Rodaliesen sareak urteak daramatzala azpifinantzatuta, baina azpimarratu du ez dela hori kontuan hartu beharreko faktore bakarra.

Horrez gainera, jakitera eman du Estatuko Errepide Sareak hartuko duela bere gain euste hormaren konponketa.

Hedabideen aurrean egindako agerraldian, behin eta berriz esan du istripuaren arrazoiak ez duela zerikusirik trenbidea zaharkituta egotearekin edota kontrol faltarekin. "Argitzeko dagoen beste arazoren bat gertatu zen eta pentsatu dezakeguna baino askoz konplexuagoa izan daiteke", esan du.

Hala ere, onartu du Yrio trenaren eta aurretik leku horretatik pasa ziren beste tren batzuen gurpiletan marka batzuk agertu direla eta horiek ikertzen ari direla jakinarazi du. Trenbidean aurkitu duten haustura bati buruz "laboratorioan argitu" beharko dela zerk eragin zuen esan du.

Bestetik, ministroaren aburuz, tren gidarien sindikatuak deitu duen greba ez da trenbidearen segurtasuna hobetzeko modurik onena. Gidariekin bilduko dela eta entzungo diela adierazi du, "haien beharrak asebetzen saiatzeko".

Adamuzeko istripuan zauritu zirenetatik seiri alta eman diete eta erietxeak utzi dituzte. Beraz, azken balantzearen arabera, 31 dira ingresatuta jarriatzen dutenak, 28 heldu eta 3 adin txikiko. Zainketa Intentsiboko Unitateetan sei lagun gelditzen dira. 

Bestetik, Kordobako Auzitegi Medikuntzako Institutuan amaitu dituzte aurkitutako 43 gorpuen autopsiak eta Guardia Zibilak horietako 42 identifikatzea lortu du.

Oscar Puente Garraio eta Mugikortasun Jasangarriko ministroarekin batera ematen ari den prentsaurrekoan, Adifeko Trafiko zuzendariak, Angel García de Banderak, jakinarazi du urtarrilaren 7an Adamuz inguruko trebideen arterketa osoa egin zutela. 

Bere hitzetan, azterketa horretan zein aurretik, urrian eta azaroan, egindako beste hiru azterketetan, ez zuten aurkitu "istripuarekin harremana izan dezakeela iradokitzen duen akatsik". 

Tren-gidarien Espainiako Sindikatuak (Semaf) hiru eguneko greba sektoriala deitu du otsailaren 9, 10 eta 11rako. Kordoban eta Katalunian izandako istripuen ostean, tren-segurtasuna bermatzeko neurriak eskatzen dituzte. 

Deitzailearen ustez, "tren-sistemaren segurtasun-estandarrak berreskuratzeko", legezko bide hori "soilik" utzi diete.

Grebak sektoreko enpresetako makinista guztiei eragingo die.

Pedro Sanchez Espainiako Gobernuko presidenteak eta Juanma Moreno Andaluziako Juntako presidenteak urtarrilaren 31n, larunbata, Huelvan biktimen aldeko Estatu omenaldia egitea adostu dute. Sanchezek eta Morenok bilera egin dute arratsaldean biktimen artatzeari eta trenbideko lanei buruzko informazio berriena elkartrukatzeko. 

Oraingoz, 43 hildako zenbatu dituzte. Horietatik 25 Huelvakoak dira eta horregatik aukeratu da hiri hori omenaldia egiteko.

Hala ere, agintariek jakinarazi dutenez, guztira, 45 pertsonaren desagerpearen inguruko salaketak jarri dira. Beraz, teknikariek lanean jarraitzen dute bi pertsona gehiagoren bila.

Erreskate taldeek beste hilotz bat aurkitu dute Adamuzen (Kordoba) pasa den igandean istripua izan zuen bi trenetako baten barruan. Gauzak horrela, 43 dira jada ezbehar horretan hildakoak. 

Kordobako tren istripuaren harira, Alviako bagoietan harrapatuta egon daitezkeen biktima gehiagoren bila jarraitzen dute. Halaber, Adamuzen Alvia trena bidetik kentzeko lanean ere ari dira.

Bartzelonako Gelida udalerrian bart gertatutako tren istripuan hildako makinista praktikak egiten ari zen (beste hirurekin batera), gidari titularra alboan zuela. 

Semaf tren-makinisten Espainiako sindikatuak greba deitu du sektorean, sarearen segurtasuna eta fidagarritasuna bermatzea eskatzeko. Izan ere, bi istripu izan dira egunotan, eta tartean hiru makinista hil dira: Adamuzen (Kordoba) 42 hildako eta Gelidan (Bartzelona) Rodaliesen hildako bat izan ondoren, Semafek ohar batean aurreratu du erantzukizun penala eskatuko diela tren-azpiegituraren segurtasuna bermatzeaz arduratzen diren pertsonei, eta Katalunian zerbitzua zirkulaziorako segurtasun-berme nahikorik gabe ez irekitzeko.

Era berean, gertakari horiek guztiek eragindako karga emozionala dela-eta zerbitzua emateko prest ez daudenei arduradunei jakinarazteko gomendatu die.

Gainera, tren-makinisten sindikatuak adierazi duenez, zerbitzuaren hasieran, tren-enpresa guztietako makinistek egin beharreko ibilbidean segurtasuna bermatzeko eskatuko dute.

Istripua izan zuen Iryoko tren-gidariak Adamuz (Kordoba) parean "krokadura bat" jasan zuela ohartarazi zuen Atochako aginte-zentrora egindako dei batean, eta bigarren komunikazio batean, berriz, ohartarazi zuen trena errailetik atera zela eta ondoko trenbidea inbaditzen ari zela. Hori dela eta, zirkulazioa "lehenbailehen" gelditzeko eskatu zuen.

Cordópolis/eldiario.es-ek argitaratutako audioaren arabera, tren-gidariak Atochako aginte-zentrora egindako lehen dei batean azaldu zuen trena "blokeatuta" zuela eta ezin zela mugitu. Gainera, trenaren egoera "ezagutu" behar zuela gaineratu zuen.

Atochako langileak pantografoak jaisteko eskatzen dio makinistari, katenariatik elektrizitatea hartzen duen trenaren mekanismoa, eta honek erantzuten dio: "Beherago ezin dira egon".

Bigarren telefono-kontaktu batean, tren-gidariak azaldu dio trenbideko trafikoa lehenbailehen gelditu behar dela, eta Atochako pertsonak esan dio "ez dagoela trenik iristen", aipatu hedabidearen arabera.

Denok Kordobako istripuari eta hango erreskate-lanei begira geunden bitartean, beste tren-istripu bat izan da Bartzelonan. 

Gutxienez 20 pertsona zauritu dira Rodalieseko 4. lineako tren batek trenbidera erori den euste-horma batekin talka egin ondoren, Gelida eta Sant Sadurni d 'Anoia artean.

Andaluziako agintariek jakinarazi dutenez, 37 pertsonak ospitaleratuta jarraitzen dute. 33 helduak dira eta lau haurrak. Horietatik bederatzi pertsona Zainketa Intentsiboetako Unitatean (ZIU) daude. 

Bestalde, 86 pertsonari alta eman zaie. Azken informazioen arabera, istripuaren ondorioz osasun-zentroetan arreta jaso duten lagunen kopurua 123 da (118 heldu eta bost adingabe).

Biktimak erreskatatzeko eta trenbidea garbitzeko lanak gelditu gabe aurrera doaz. Iryo treneko bagoiak gauean aterako dituzte trenbidetik. 

Orain, Alviako bagoietan ari dira lanean, zehazki kafetegia zegoen bagoian. Han "zehaztasun handienarekin" lan egiten duen guraize baten antzeko makina batekin zatiak mozten dituzte eta matxarda edo pintzen lana egiten duen beste batekin horiek kentzen ari dira. Bidaiariren bat egon litekeela uste den lekuetan ari da lanean. Ondoren, lau metroko lubetan behera eroritako beste bi bagoien txanda izango da.

Exekutiboan badakite oraindik goiz dela omenaldi horren data jartzeko; izan ere, lehenik eta behin, txikitutako bagoien hondakinen artean harrapatuta egon daitezkeen pertsona guztiak aurkitu eta atera behar dira. Hala ere, Moncloaren asmoa da hileta laster egitea, beranduenez otsailean.

Adamuzen istripua izandako Alvia trenean harrapatuta zeuden hiru gorpuak ateratzea lortu dute erreskate taldeek. Azken balantzearen arabera, 42 dira ezbeharrean hildakoak, beste bat aurkitu baitute. Alabaina, 10 biktima identifikatu dituzte, orain arte. Desagertutakoak 43 dira.

Fernando Grande-Marlaska Barne ministroak astearte honetan Ministroen Kontseiluaren osteko prentsaurrekoan azpimarratu duenez, "hipotesi guztiak zabalik daude", baina sabotajearen balizko aukera baztertu du.

Marlaskak gogorarazi duenez, Trenbide Istripuen Ikerketa Batzordeak (CIAF) aipatuta, "laborategian aztertu beharko dira errailetatik irteteko hasierako errailak, eta tailerrean ikuskatu beharko da Iryo ibaiaren errodadura".

Sabotajeari dagokionez, "inoiz ez da aukera hori aztertu", esan du, baizik eta "gai teknikoetan eta trenbideko garraioan" zentratu direla. 

Semaf makinisten sindikatuak astearte honetan azaldu duenez, trenbidearen azpiegituraren mantentze-lanen protokoloa berrikustea eskatu zuen bidaiarien erosotasunagatik eta trenei eragiten zien kalteagatik, baina ez segurtasun ezaren zantzuak zeudelako.

Sindikatuko idazkari nagusi Diego Martinek Onda Cero irratian egindako elkarrizketa batean adierazi duenez, Semafek gutun bat bidali zien 2025eko abuztuan tren-azpiegituraren arduradunei, lineetan "irregulartasunak" eta "bibrazioak" areagotu zirela egiaztatu ondoren, zerbitzua liberalizatu eta operadore berriak sartu ondoren trenbideak gehiago erabili zirelako.

Guardia Zibilak helikopteroz eramaten ditu senide zuzenek emandako DNA laginak, ondoren Madrilgo Institutu Armatuaren Kriminalistika laborategian aztertzeko.

Zuzeneko senideen lehen DNA laginak Huelvan, Malagan eta Sevillan prestatutako puntuetan jaso dira, Guardia Zibilak zehaztu duenez. Kordoban eta Madrilen ere antzeko puntuak jarri ditu.

Iryo trenaren 6. bagoia, errailetik atera zen lehena, bereziki ikertzen ari da Guardia Zibila, tren-istripuaren arrazoiekin izan dezakeen lotura aztertzeko.

Iryo trena Madrilerantz zihoan, Huelvarako kontrako norabidean zihoan Alvia jo zuenean. 

Andaluziako Osasun Zerbitzuak (SAS) 2.990 odol-poltsa jaso ditu astelehenean, ohiko egun bakarrean jasotzen diren odol-poltsak baino hiru aldiz gehiago (normalean  800 eta 900 artean daude). SASeko iturriek adierazi dutenez, odol-erreserbak bermatuta daude, eta asmoa da donazioak gutxinaka jasotzen jarraitzea, joan den igandean Kordobako Adamuz herrian gertatutako tren-istripuaren biktimei arreta emateko deitu ostean.

Beste tragedia batzuetan gertatu izan den bezala, hainbat erabiltzailek adimen artifiziala erabiliz sortutako irudi eta bideoak eta informazio faltsuak zabaldu dituzte. 

Andaluziako Juntak informazio gune bat jarri du Kordobako Zezen Plazaren ondoan dagoen Mendebaldeko Gizarte Etxean.

Osasun-zerbitzuek eta psikologoek 116 senide artatu dituzte astelehen honetan.

Familiek hotel-establezimenduetan eman dute gaua, eta astearte honetan laguntza eta arreta jasotzen jarraituko dute. 

Fernando Grande-Marlaska Espainiako Barne ministroak adierazi duenez, Adamuzeko tren-istripuaren biktimen gorpuak berreskuratzeko eta identifikatzeko lanek gau osoan zehar jarraitu dute, eta operatiboa "normaltasuna berreskuratu arte" egongo da martxan.

Andaluziako Juntak informazio gune bat jarri du Kordobako Zezen Plazaren ondoan dagoen Mendebaldeko Gizarte Etxean. 

Dagoeneko 41 dira tren-istripuan hildako lagunak, errailetik atera zen Iryo trenean gorpu berri bat aurkitu ondoren, Garraio eta Mugikortasun Jasangarriaren Ministerioko iturriek baieztatu dutenez.

Erietxetan 39 lagun daude ospitaleratuta, horietako 13 ZIUn (horietako bat adingabe bat da). 

Astelehen honetako 18:45ak arte, 122 pertsona artatu dituzte ezbeharraren ondorioz (117 heldu eta bost haur). 

Bihartik aurrera, garraiorako plan alternatiboa jarriko du martxan Renfek, Adamuzeko istripuan kaltetutako bidaiarientzako; horiek guztiak euren helmugara iristeko baliabideak jarriko ditu tren-konpainiak, Madril eta Andaluzia arteko abiadura handiko tren zerbitzua etenda dagoen bitartean. Agiri batean jakinarazi du, lehenbailehen jarriko dutela erabiltzaileen eskura informazio guztia. 

Oscar Puente Garraio eta Mugikortasun Iraunkorreko ministroak ziurtatu duenez, ikerketak argitu behar du trenbidearen zati baten haustura  trena errailetik atera izanaren "arrazoia edo ondorioa" den. 

Juanma Moreno Andaluziako Gobernuko presidenteak azaldu duenez, istripua izan duten Alvia trenak erretiratzeko garabia jartzen hasi dira ezbeharraren lekuan. "Material asko dago erretiratzeko, eta denbora asko beharko da", zehaztu du. 

Halaber, gaineratu du hildakoan kopuruak —azken datuen arabera, 40 dira— gora egin dezakeela, ia ziur uste baitute bidaiarien gorpuak egon daitezkeela bagoien azpian harrapatuta. 

Alberto Nuñez Feijoo PPko presidentearekin egin du agerraldia Morenok, arratsaldean, hedabideen aurrean, azken orduko informazioa jakinarazteko. 

Ikerketako iturriek emandako azken datuen arabera, Adamuzen izan den tren-istripuan hildakoen kopurua 40ra igo da. 

Oscar Puente Garraio ministroak azaldu du Adamuzen trenbide zati bat apurtuta egoteak ez duela zertan esan nahi hori dela istripuaren kausa. "Arrazoia edo ondorioa izan daiteke", argitu du.  

La 2 telebista katean egin ditu adierazpenok Puentek. Izan ere, istripua izan den tokian, trenbidearen zati batek soldadura askatuta duela egiaztatu dute ikerlariek. "Arrazoietako bat izan daiteke, zantzu bat gehiago, baina ezin da ondorioztatu hori denik kausa", nabarmendu du. 

Oscar Puente Garraio ministroak bart esandakoaren bidetik, Carlos Bertomeu Iryo konpainiaren presidenteak gaur esan du ezbeharra "arraroa" izan dela. "Istripu arraroa da. Ez da bihurgune batean gertatu, bide zuzen batean baizik. Trena ez zihoan abiadura bizian, erdibideko batean baizik. Hiru urte dira trena erosi genuela, eta puntako teknologia du. Berrikuspen eta mantenu lanak ere eguneratuta zituen", argudiatu du. 

Tren Istripuak Ikertzeko Batzordeak (CIAF, gazteleraz) abiatu duen ikerketaren lehen datuen arabera, Iryo abiadura handiko trenaren azken bi bagoiak trenbidetik atera ziren Adamuzeko geltokira sartu baino lehen, ondoko errailean sartu ziren eta Renfe Alviaren trenaren kontra jo zuten. Ondorioak behin-behinekoak direla zehaztu dute CIAFko teknikariek, eta hortaz, aldaketak egon litezkeela. 

Istripua tarteko, Madril eta Andaluzia arteko abiadura handiko trenik ez da egongo, gutxienez, ostiralera arte. 

Iryo konpainia pribatuak bertan behera utzi ditu ordura arte zituen bidaia guztiak. Beste operadoreek ez dute, oraingoz, datarik eman. 

Abiadura handiko linea itxita dagoela eta, Renfek indartu egingo du ibilbide ertaineko trenen maiztasuna, Madril eta Sevilla artean, Extremadura gurutzatuta. 

Halaber, Iberia eta Air Europa hegazkin konpainiek eta Alsa autobus enpresak euren zerbitzua indartuko dute. 

Andaluziako Juntak istripuaren ostean martxan jarritako protokoloa indartu du, eta guztira, 27 auzitegiko mediku mugiarazi ditu Adamuzera, hildakoen identifikazioan jardun dezaten. 

Juanma Moreno Andaluziako presidenteak ohartarazi duenez, identifikazio lanak "zailak eta konplikatuak" izango dira; "ez da azkarra izango", erantsi du. Aitortu duenez, arinago joatea nahiko luke, senitartekoen "samina" arintzeko. 

Espainiako presidenteak hitza hartu aurretik, Juanma Moreno Andaluziako Juntako presidentea aritu da berbetan. 

Tren istripuen Ikerketa Batzordeak (CIAF, gazteleraz) ireki egin du bart Adamuzen (Kordoba) izandako tren ezbeharraren inguruko espedientea. Erakundeak ez ditu istripuaren erantzuleak edo erantzukizuna ezarriko. Helburua da akatsak zehaztu eta halako tragedia bat ez errepikatzeko neurriak hartzea. 

Behera egin du erietxean dauden zauritutakoen kopuruak. 43 dira, Andaluziako Osasun Zerbitzuak jakinarazi berri duenez.

Hortaz, 79ri senda-agiria eman diete. 

Zainketa Intentsiboen Unitatean daudenen kopurua ez da aldatu: 12 dira, eta tartean adingabe bat dago. 

13:30erako zegoen aurreikusia, Adamuzetik bertatik. 

Trenbidea berritzeko lanak pasa den maiatzean amaitu zituzten, eta ekainean bibrazioengatik arazoren bat izan zen gune horretan, Espainiako Gobernuak PPk Senatuan egindako galdera bati erantzunez igorritako erantzunaren arabera. Atzerapena eragin zuen trenetan, baina besterik ez. 

Pedro Sanchez Espainiako Gobernuko presidenteak eta Oscar Puente Garraio ministroak agerraldi bateratua eskainiko dute Adamuzen bertan, 13:30etatik aurrera.

CIAF Tren Istripuen Ikerketa Batzordeak espedientea zabaldu du dagoeneko, Kordobako Adamuz udalerrian bart gertatutako ezbeharraren nondik norakoak argitzeko.

Aipaturiko batzordeko ikertzaile talde bat atzodanik tokian bertan lanean ari da. 

Guardia Zibilak DNA biltzeko bost gune zabaldu ditu Madrilen, Sevillan, Huelvan, Malagan eta Kordoba, tren istripuko biktimak errazago identifikatzeko asmoz. 

Bulego horietan, gainera, senideen lokalizazioari eta egoerari buruzko informazioa emango zaie. 

Atzo, Kordobako Adamuz udalerrian, abiadura handiko bi trenen artean gertatutako istripua, Espainian inoiz gertatu den laugarren larriena da. 

Espainian hildako gehien eragin dituen tren istripua 1944ko urtarrilaren 3an gertatu zen, Leongo Torre del Bierzo udalerrian. Erregimen frankistak ezbeharra isilarazi egin zuen, eta gerora Renfek emandako zifra ofiziala 78 hildako eta 75 zauritu izan baziren ere, 500 inguru, zenbait iturriren arabera.

Espainiako bigarren tren ezbeharrik handiena 2013ko uztailaren 24an gertatu zen, Angroisen (A Coruña). 80 pertsona hil eta 143 zauritu ziren.

1972ko uztailean, 79 pertsona hil ziren El Cuervo eta Lebrija geltokien artean (Sevilla) bi trenek elkarren aurka talka egin ondoren. 

Pedro Sanchez Espainiako Gobernuko presidenteak ez du parte hartuko bihartik aurrera Suitzan egingo den Davoseko Foroan, Kordobako tren istripua tarteko. 

Sanchez Adamuz udalerrira bidean da eta gaurko agenda bertan behera utzi du, Alberto Nuñez Feijoo PPko presidentearekin egitekoa zuen bilera barne.

Gutxienez 39 pertsona hil dira, abiadura handiko bi tren errailetik aterata, Adamuzen (Kordoba), Espainiako Barne Ministerioko iturriek baieztatu dutenez.

Gainera, 152 pertsona ospitaleratu dituzte, bost larri eta 24 oso larri, eta 123 pertsonak bestelako zauriak izan dituzte.