EPAIKETA
Gorde
Kendu nire zerrendatik

Maialen Mazonen hilketagatik akusatutako gizonak uko egin dio epaiketan deklaratzeari

Ondorioen idatzian, akusazioek 45 urteko kartzela eskariari eutsi diote Mazonen ustezko hiltzailearentzat, eta defentsak ere hasierako eskaria mantendu eta absoluzioa galdegin du.  

GRAFCAV2860. VITORIA, 04/05/2026.-Primera sesión del juicio con jurado popular al presunto asesino (en la imagen) de Maialen Mazón, la mujer de 32 años que estaba embarazada de gemelos en el momento de su asesinato en mayo de 2023. EFE / L. Rico
Maialen Mazonen hilketaren akusatuaren artxiboko argazkia, epaiketaren lehen saioan.

Arabako Lurralde Auzitegian aurrera jarraitzen du Maialen Mazonen hilketa argitzeko epaiketak. Gaur akusatuaren txanda zen, baina azken unean deklaratzeari uko egin dio: “Uste dut ondoezik nagoela eta ezin dudala deklaratu”, azaldu dio epaileari. 

45 urteko espetxe-zigorra eskatzen du fiskaltzak harentzat: 25 urte, azpikeriaz eta ankerkeriaz hiltzeagatik, ahaidetasun- eta genero-astungarriekin; 8 urte, abortu-delitu bakoitzeko (bikiez haurdun zegoen), eta 4 urte, adingabea abandonatzeagatik. Defentsak absoluzioa eskatu du, buru nahasmendu iragankorra zeukala argudiatuta.

Krimena 2023ko maiatzaren 27ko arratsaldean gertatu zen, Arabako hiriburuko apartahotel batean, baina hurrengo egunera arte ez zen horren berri jakin. Bien bi urteko alaba (onik atera zen) amaren hilotzaren ondoan egon zen, bakarrik, 18 orduz.

Apartahoteleko segurtasun-kameren irudiak aztertuz ekin diote gaurko saioari. Irudietan bikotea alabarekin iristen ikusten da, baita akusatua behin baino gehiagotan sartu eta irteten dela adingabearekin. Emaztea hil ondoren, ustezko hiltzailea gelatik ateratzen ageri da irudietan, arropan odol-orbanak zituela, motxila bat soinean eta plastikozko poltsa batekin. Ustez, arma zeraman barruan; oraindik, ordea, ez dute aurkitu.

Irudiak ikusi eta gero, baina, akusatuak ez deklaratzea erabaki du, bere defentsarekin kontsultatu ondoren. Epaiketak akusazioen ondorioekin jarraituko du, baita defentsaren azalpenekin ere; gero, azken hitza eta epaia epaimahaiaren esku geratuko dira.

Akusazioen eta defentsaren ondorioak

Ondorioen idatzian, akusazioek 45 urteko zigor-eskariari eutsi diote emakume arabarraren ustezko hiltzailearentzat, "hiltzeko asmoarekin" sastakatu zuela eta "egiten ari zenaz oso kontziente" zela argudiatuta. 

Gainera, ondorioen azken txostenean zenbait moldaketa erantsi dituzte akusazio partikularrak eta herri akusazioak. Horietako batean, zehazten da akusatuak biktimaren aitari esan ziola alabari haurdunaldia eten zezala eskatzeko, eta Maialenen lagun bati ere esan ziola emakumeak abortatu egin behar zuela. 

Beste moldaketa Fiskaltzak egindakoa da, eta gainerako akusazioak bat etorri dira. Hilketa aurreko orduetan akusatuak edandako alkohol kopurua ardo kopa bat eta uxual txupito bat izan zirela jasota geratu da idatzian. 

Bere aldetik, defentsak ere hasierako eskaria mantendu eta absoluzioa eskatu du gizonezkoarentzat, argudiatuta gertakariak izan ziren unean errealitatetik "deskonektaturik" eta "disoziatuta" zegoela. 

Argudio horiek aintzat hartuko ez balira, defentsak galdegin du auzipetuak alkoholarekin eta drogekin duen mendekotasuna aringarritzat hartzea 

Biharko saioan aurkeztuko dituzte aldeek ondorioak, epaiketaren azken saioan. 

 

Zure interesekoa izan daiteke

Gehiago ikusi
Publizitatea
X