Gorenak errefusatu egin du etorkinen erregularizazioa kautelaz geldiaraztea

Auzitegi Gorenak atzera bota du Espainiako Gobernua egiten ari den immigranteen ezohiko erregularizazioa kautelaz geldiaraztea, eta errefusatu egin du Madrilgo Erkidegoak eta Voxek, besteak beste, egindako eskaria.

Bost saio egin ondoren hartu du erabakia Goreneko Administrazioarekiko Auzien Salak. Saio horietan, Gobernuaren eta bost eskatzaileen (Isabel Díaz Ayusoren gobernua, Vox, Hazte Oír, Asociación por la Reconciliación y la Verdad Histórica eta Asociación Libertad y Justicia) argudioak entzun ditu.

Hiru ordu baino gehiagoko eztabaidaren ondoren, Auzitegiak baztertu egin du Hazte Oir, Libertad y Justicia eta Asociación por la Reconciliación y la Verdad Histórica elkarteen errekurtsoak tramitera onartzea, neurria Justiziaren aurrean inpugnatzeko legitimaziorik ez dutela iritzita.

Aitzitik, Voxen eta Madrilgo Erkidegoaren legitimazioa onartu du, baina ez du onartu kautelaz errege-dekretua bertan behera uztea, haiek eskatu bezala.

Gobernua, pozik

Espainiako Gobernuak pozik hartu du Auzitegi Gorenak hartutako erabakia. Izan ere, Gizarte Segurantza eta Migrazio Ministerioko iturrien esanetan, "milaka lagunen oraina eta etorkizuna argitzen ditu". 

Erregularizazioa izapidetzeko onarpena jaso dutenentzat lasaigarria dela esan dute, horrekin batera Espainian bizi eta lan egiteko behin-behineko baimena jaso baitute, eta oraindik ebazpenaren zain dauden edo dokumentazioa aurkeztuko duten horiei "itxaropena izaten laguntzen die".

Ia 550.000 eskaera

Erregularizaziorako errege-dekretua apirilaren 16an sartu zen indarrean, Espainiako Estatuan bizi diren 500.000 pertsonari bizileku- eta lan-baimena emateko helburuarekin. Azken datuen arabera, Gobernuak 549.596 eskaera jaso ditu, eta horietatik 91.505 izapidetzeko onartu dira; hau da, Espainian bizitzeko eta lan egiteko behin-behineko lehen baimena eman zaie.