Migratzaileen erregularizazioa: jakin behar duzun guztia, urratsez urrats

Espainiako Gobernuak ezohiko erregularizazio prozesu bat onartu du, Espainian egoera irregularrean dauden migratzaileei zuzendua, eta neurri horrek dagoeneko Estatuan bizi diren ehunka mila laguni mesede egingo die. Prozedura apirilaren 16an sartuko da indarrean eta ekainaren 30era arte iraungo du, eta eskaerak telematikoki nahiz aurrez aurre aurkezteko aukera izango da.

Merkurio plataformaren bidez egin ahal izango da, egunaren 24 orduetan. Online bide hori da aukerarik azkarrena; bulego batera joatea aukeratzen dutenek, berriz, hitzordua eskatu beharko dute aldez aurretik, derrigor. Arreta presentziala apirilaren 20an hasiko da, Gizarte Segurantzaren, Posta Bulegoaren eta Atzerritarren arretarako bulegoetan, baina Espainiako Gobernuak ohartarazi duenez, zentro eta ordutegi guztiak ez dira erabilgarri egongo.

Erregularizazioa lortzeko baldintzak

Prozesu horri heldu ahal izango diote 2026ko urtarrilaren 1a baino lehen Espainian dauden eta herrialdean gutxienez bost hilabetez jarraian egon diren migratzaileek. Gainera, ezinbestekoa izango da aurrekari penalik ez izatea eta ordena publikorako mehatxu ez izatea.

Oinarrizko baldintza horiekin batera, eskatzaileek honako ziurtagiri hauetako bat izan beharko dute, gutxienez: Espainian lan egin izana, zuzeneko familia-loturak izatea (adingabeko seme-alabak, beren kargura dauden mendeko pertsonak, adibidez) edo kalteberatasun-egoeran egotea. Egoera hori ofizialki egiaztatu beharko da.

Aurkeztu beharrekoak

Espainian egindako egonaldia frogatzeko, agiri ugari onartuko dira, publikoak zein pribatuak, baldin eta egiaztagiriak badira eta data jarrita badute. Horien artean, erroldatzea (derrigorrezkoa ez bada ere), fakturak, mediku-txostenak eta kontratuak daude.

Beharrezkoa da izapidea egiteko beharrizana duenak aurrekari penalik ez izatea eta hori egiaztatzea; ezinbesteko baldintza da hori, eta, Espainiako Gobernuaren arabera, zorrozki aplikatuko da espedienteak izapidetzen diren bitartean.

Nola egin eskaera?

Izapidea online egin ahal izango da ziurtagiri digitalen bidez, abokatuen zein administrazio-kudeatzaileen bitartez, bai eta baimendutako erakunde laguntzaileen bidez.

Aurrez aurreko bideari dagokionez, apirilaren 16tik aurrera hitzordua eskatu beharko da, Internet bidez zein 060 telefonoaren bidez. Gizarte Segurantzaren bulegoek arratsaldez emango dute arreta; Correosen sukurtsalek, berriz, ordutegi zabalagoa izango dute, eta Atzerritarren bulegoek arratsaldez ere emango dute arreta.

Non eskatu?

Euskadin, Gizarte Segurantzaren bulegoetan, postetxeetan eta Atzerritarren arretarako bulego batzuetan egin ahal izango da izapidea, eta horien berri zehatza informazio ofizialean emango da. Arreta-guneak egongo dira, hiru probintzietan. Dena den, komeni da aldez aurretik galdetzea zer bulego dauden prestatuta joan-etorriak alferrik ez egiteko.

Zer lortuko da erregularizazioarekin?

Aldeko ebazpena lortzen dutenek Espainian bizitzeko eta lan egiteko baimena jasoko dute, hasiera batean urtebeteko iraupenarekin. Gainera, Gizarte Segurantzako afiliazio-zenbakia esleituko zaie, eta osasun-sistema publikoan sartzeko aukera izango dute.

Adingabeen kasuan, bizileku-baimena bost urtekoa izango da, eta familiaren eskaerarekin batera izapidetu ahal izango da.

Lehenengo urtea igarotakoan, onuradunak Atzerritarren Legean aurreikusitako bide arruntetan sartu ahalko dira, eta horrek erraztuko du pixkanaka-pixkanaka sisteman sartzea.

Aurrekariak

Espainian egingo den zazpigarren erregularizazio prozesua izango da. Aurreko seiretan 1,3 bat milioi lagunen egoera erregularizatu zen. Espainiako Gobernuak neurri hori defendatzen du orain, gizarte-errealitatea ordenatzeko, integrazioa errazteko eta lan-merkatuaren premiei erantzuteko beharrezko tresna gisa.