Emakume bat gasolindegi batean erditu da Lizarran

Emakume batek umea izan du Lizarrako gasolina-zerbitzugune batean, Lizarrako Udaltzaingoak jakinarazi duenez.

Udaltzaingoaren arabera, 06:00ak aldera jaso dute SOS Nafarroaren abisua.

Agenteak gasolindegira iritsi direnean, emakumearen bikotekidea eta gasolindegiko langile bat ari ziren emakumea artatzen. Haurra gasolina-hornigailuen artean jaio da, udaltzainen arabera.

Haur jaioberria manta termiko batekin estali dute, hoztu ez zedin, larrialdi zerbitzuetako langileak iritsi arte. Anbulantzia heldu denean, Garcia Orcoyen Lizarrako ospitalera eraman dituzte ama eta umea.

Udaltzaingoaren esanetan, ondo daude biak.