Madril, Avila eta Toledoko suek zertxobait hobera egin dute meteorologiari esker

Madrilgo Erkidegoan eta Avilako probintzian piztutako baso-sute handiek aktibo eta egonkortu gabe jarraitzen dute igande honetan. Hala ere, eguraldiaren bilakaera ona izan da eta bezperan baino hobea da egoera. 

Suteak 280 kilometrotik gorako perimetroa hartzen du dagoeneko, eta 77.000 hektarea erre ditu: 47.000 Avilan, 27.000 Madrilen eta 2.000 Toledon. Burgoondon (Avila) piztutako sutea Espainiako historiako handiena da erregistroak daudenetik.

Larrialdiaren ondorioz, 90.000 pertsona ebakuatu edo konfinatu dituzte Madrilen, Avilan eta Toledoko iparraldean. Gobernuak 39 udalerri ebakuatzea erabaki du: 16 Avilan, 12 Madrilen eta 11 Toledon.

Zazpi herrik konfinatuta jarraitzen dute Avilan eta Madrilen, eta Madrilgo Villa del Prado herria ere konfinatu egin dute arratsaldean. Villa del Pradorako norabidean dagoen El Encinar del Alberche urbanizazioa ere hustu egin dute.

Avilako suari lotuta, pertsona bat atxilotu du Guardia Zibilak eta beste bat ikertzen ari da baso-sutearen delitu bat egotzita. Prozedura horretan Gaztela eta Leongo Junta akusazio gisa aurkeztuko da.

Sute horiei guztiei Castelloko La Vall d 'Uixoko sutea gehitu behar zaie, kontrolik gabe jarraitzen baitu, 4.300 hektarea baino gehiago erre ondoren. Ia hogei udalerritako 16.000 pertsona baino gehiago etxetik aterarazi behar izan dituzte.

Oraingoz, 41 errepide itxi dituzte lau probintziatan: 14 Toledon, 12 Avilan, 8 Madrilen eta 7 Castellonen, Barne Ministerioaren datuen arabera.

Gauean, CECOPIaren ondoren, Markaska ministroak esan du Avila eta Madril erasaten ari diren suteak "poliki" ari direla garatzen, baina "positiboki behintzat". 

Pedro Sanchez Espainiako presidenteak Vall d 'Uixoko suteak kaltetutako eremua bisitatuko du astelehen honetan.

Sanchezek bilakaera baikorra nabarmendu du

Gaur Espainiako Gobernuko presidenteak Navaluengako (Avila) Aginte Postu Aurreratua bisitatu ostean adierazi duenez, itzaltze-lanek "zailak" izaten jarraitzen duten arren, Avilako, Madrilgo eta Toledoko suteen bilakaera "oso positiboa" izaten ari da. Azaldu duenez, su-gune batzuk dagoeneko "finkatuta" daude, baina larrialdi-zerbitzuek lanean jarraitzen dute berriz ez pizteko.

Era berean, iragarri du Ministroen Kontseiluak astearte honetan onartuko duela suteek kaltetutako lurraldeak babes zibileko larrialdi baten ondorioz bereziki kaltetutako eremu izendatzeko errege dekretua. Halaber, zabaldutako operatiboan lanean ari diren guztiei eskerrak eman dizkie, eta administrazioen arteko koordinazioa nabarmendu du.

Nazioarteko laguntzarekin indartutako operatiboa

Larrialdiaren tamaina dela eta, Portugal, Grezia eta Italia sutea itzaltzeko lanetan ari dira elkarlanean, 176 langilerekin, 41 ibilgailurekin eta Canadair motako lau hegazkin anfibiorekin, Europar Batasunaren Babes Zibilerako Mekanismoaren bidez.

Bizkaiak ere 30 suhiltzaile eta baso-langile bidali ditu eremura. Larunbatean abiatu ziren Basauriko suhiltzaile-etxetik, 13 ibilgailurekin eta beharrezko material espezializatuarekin, itzaltze-lanetan laguntzeko.

Espainiako Gobernuak UMEko 1.201 militar, lurreko 400 baliabide, Guardia Zibileko eta Babes Zibileko 1.100 agente baino gehiago, aireko 20 baliabide baino gehiago, Polizia Nazionaleko 220 agente eta Babes Zibileko beste 110 langile ditu mobilizatuta.

Osasun Ministerioak gomendioei eutsi die

Mónica García Espainiako Osasun ministroak berriro eskatu die kearen eraginpeko eremuetako herritarrei ahal den neurrian aire zabalean ez egoteko, airearen kalitatea txarra delako.

Osasun Ministerioak gomendatu du etxetik atera behar izanez gero FFP2 edo FFP3 maskarak erabiltzea, ateak eta leihoak itxita mantentzea, beharrezkoak ez diren joan-etorriak saihestea eta arnasa hartzeko zailtasunak, bularreko mina edo aire falta izanez gero osasun-zentro batera jotzea.