Urriaren 7a jaieguna izango da 2027an, lehen Eusko Jaurlaritzaren 90. urteurrenaren omenez

Lehen Eusko Jaurlaritzaren 90. urteurrena ospatzeko era guztietako 40 ekitaldi baino gehiago bilduko dituen egitaraua aurkeztu du gaur Jaurlaritzak, nabarmenena, 2027ko urriaren 7 jaiegun izango dela, 1936an Jose Antonio Agirre lehendakaria buru izan zuen Eusko Jaurlaritza, Gernikako (Bizkaia) Batzar Etxean, eratu zela gogora ekartzeko.

Eusko Jaurlaritzak urteurrena oroitzeko prestatu duen agendaren berri eman du, Imanol Pradales lehendakariaren hitzaldiarekin amaitu den ekitaldi batean.

Agenda oroigarriak berrogei ekimen baino gehiago bilduko ditu, Agirre lehendakariaren eta bere lantaldearen ondarea gogoratzeko, eta etorkizunerantz proiektatzeko haren sorreraren oinarri izan ziren balioak: demokrazia, askatasuna eta justizia soziala.

Testuinguru horretan, eta Gobernu Kontseiluak hartutako erabakiaren ondoren, 2027ko urriaren 7a jaieguna izango da EAEn. Hain zuzen, 1936ko urriaren 7an, duela 90 urte, Gernikako Batzar Etxean, historiako lehen Eusko Jaurlaritza eratu zen.

Pradalesek lehen Eusko Jaurlaritza hori ezohikoa izan zela gogorarazi du, "frankismoaren mehatxupean itxaropen, humanismo eta elkartasun proiektu bat eraikitzeko gai" izan zelako. Eta “gaur egun, 90 urte geroago, distira betean dago”, gehitu du.

Eredugarritzat jo eta orduan egindakoa goraipatu du, "erradikaltasunaren aurrean moderazioaren irudia" izateagatik, eta "eredu horrek interpelatzen gaitu, blokeen eta blokeoen, populismo eta autoritarismo modu berrien, eta klima-aldaketa, migrazioak eta desberdinkeriak dakartzaten erronkaz beteriko mundu batean”.

Lehendakariak esan du "gerra kabinetea baino askoz gehiago" izan zela, "zerbitzu publikoak garatzeko, kultura eta euskara indartzeko eta garai hartarako gizarte politika aurreratuak bultzatzeko" gai izan zelako.