Galarretako sutea bizitu egin da atzera, eta sua itzaltzeko operatiboa indartu behar izan dute

Arabako suhiltzaileak buru-belarri ari dira Galarretako sutea itzaltzeko lanetan, haizeak goizaldean sugarrak berriz piztu ostean. Kanpezu, Espejo, Agurain eta Langraiz Okako suhiltzaile-parkeetako langileek osatutako operatiboa dago une honetan bertan.

Bingen Zupiria Eusko Jaurlaritzako Segurtasun sailburuak uste du gaur eta bihar artean sugarrak kontrolatu eta sutea itzali ahal izango dutela, nahiz eta baldintza meteorologikoek lanak zaildu. Bestalde, Iñaki Gurtubai Arabako Foru Aldundiko suhiltzaileen arduradunak baso-sutearen egoeraren balorazioa egin du, eta adierazi du eguraldiak zein lursailaren egoerak (lehor dago) lanak zailtzen dituztela.

Sutea joan den ostiralean piztu zen, tximista baten ondorioz, Aizkorri-Aratz Parke Naturalaren inguruan. Arabako suhiltzaileek larunbat goizean itzaltzea lortu bazuten ere, sugarrak berriro piztu ziren eta hainbat foku daude une honetan.

Mendi-eremua denez, ez da inor bizi; hortaz, ez dago arriskurik biztanleentzat, eta, ez da, momentuz, inor etxetik aterarazi behar izan.

Itzaltze lanetan ari direnen helburu nagusia da berriro erretzen ari den lurgunearen perimetroa ahalik eta azkarren ixtea. Horretarako, hainbat hondeamakinarekin ari dira ingurua babesteko suhesiak eraikitzen. 

Koordinazioa eta aireko baliabideen laguntza

Lau suhiltzaile-parketako langileak eta 20 bat lagunek osatutako brigada ari dira lanean bertan. Horiez gain, aireko laguntza jaso dute, eta Trantsizio Ekologikorako eta Erronka Demografikorako Ministerioaren bi ACT hegazkin ere gehitu dira itzaltze-lanetara.

Zupiria sailburuak nabarmendu du lurreko zein aireko efektiboen mobilizazio koordinatuak argi erakusten duela lehendakariak legegintzaldi hasieran lehentasuntzat ezarri zuen larrialdi-sistema eredua, edozein arrisku-egoeraren aurrean azkar erantzuteko.