ELAk iragarri du sektore-hitzarmenetako 27 negoziaziotan euskara soilik erabiliko duela

ELA sindikatuak Lan Harremanen Kontseiluari (LHK) eskatu dio euskaraz negoziatzeko beharrezko baliabideak jartzea, eta iragarri du irailetik aurrera Euskal Autonomia Erkidegoan eta Nafarroan negoziazio-prozesuan dauden sektore-hitzarmenetako 27tan euskara baino ez duela erabiliko.

Sindikatuak Hego Euskal Herrian indarrean dauden 1.499 hitzarmen aztertu ditu, eta ondorioztatu du horien % 83,19k ez duela jasotzen "euskal hiztunen hizkuntza-eskubideak lan-esparruan bermatzeko neurririk", ELAk astearte honetan jakinarazi duenez.

Sindikatuaren ustez, "euskarak gaztelaniaren menpe jarraitzen du Hego Euskal Herriko negoziazio kolektiboan".

Neurri sinbolikoak

ELAk adierazi du aztertutako hitzarmenetan jasotzen diren neurri gehienak izaera sinbolikokoak direla, eta horietatik "% 5,07k baino ez" dutela euskara-plana edo plana egiteko konpromisoa.

Emandako datuen arabera, hitzarmenen % 13,8k hizkuntza ikasteko laguntzak aurreikusten ditu; % 4,37k lanorduetan euskara ikasteko aukera ematen du; eta % 1,66k baino ez du ezartzen euskara jakitea kontratazioan baloratuko dela.

Horren aurrean, ELAren iritziz, "beste edozein zapalkuntza sozialekin gertatzen den bezala (genero-, klase- edo arraza-zapalkuntzekin, esaterako), hizkuntza-zapalkuntza hizkuntzen erabilera arautuz eta mendekotasun-egoera gainditzeko baliabideak bideratuz soilik gaindi daiteke".

Sindikatuak aitortu du ez duela lortu "hizkuntza-eskubideak beste lan-aldarrikapen batzuen maila berean kokatzea, hala nola soldata-hobekuntzak edo lanaldi-murrizketa", eta hori egotzi dio "patronalek euskararen normalizaziorako neurriak negoziatzeari uko egiteari, bai eta sindikatuek eskubide horien aldeko mobilizazio eta greba espezifikoak antolatzeko izan duten ezintasunari ere".

Horren harira, LHKri eskatu dio negoziazio-mahaiak euskaraz garatzeko behar diren baliabideak jar ditzala, eta aurreratu du gaur egun negoziazio-prozesuan dauden sektore-hitzarmenetako 27 euskaraz soilik negoziatzeko erabakia hartu duela.

ELAk irailetik aurrera berritu behar diren sektoreko 27 lan-hitzarmenak euskara hutsean negoziatuko dituela iragarri izana txalotu du LABek ohar baten bidez. Dena dela, sindikatuak deitoratu egin du ekimena elkarrekin bultzatu ez izana; izan ere, bere ustez, "eraginkorragoa" izango litzateke elkarlanean aritzea.

Era berean, bermeak eskatu ditu euskara lan- zein justizia-esparru guztietan erabili ahal izateko, eta indarrak elkartzeko deia egin dio ELAri patronalaren blokeoari aurre egiteko.

Euskadiko CCOOk, berriz, herrialdearen errealitatetik kanpo egotea egotzi dio ELAri. Sindikatuaren arabera, administrazio publikoko hizkuntza-profilen eskema sektore pribatuan txertatzeak langile zaurgarrienak kaltetuko ditu, eta neurria "kolpe gogorra" dela adierazi du.

Bere aldetik, UGTk ELAri eskatu dio euskararen inguruan "akordioak eraikitzeko" urratsak eman ditzala, "ultimatumak" bota beharrean. Sindikatu espainiarrak "oso arriskutsutzat" jo du "genero, klase edo arraza zapalkuntzekin alderatzea" hizkuntza eskubideen urraketak.