Madrilgo suteak "fronte bakarrean" batu dira, eta herri gehiago daude arriskuan

Almoroxen (Toledo) eta San Martin de Valdeiglesiasen (Madril) piztutako suteak fronte bakar batean batu dira, eta, ondorioz, Madrilgo hego-mendebaldeko beste hiru udalerri hustu behar izan dituzte azken orduotan. Suteak kontrolik gabe jarraitzen du aurrera, sua itzaltzeko lanetan laguntzen ez duten tenperatura altuen eta haize-bolada bortitzen eraginez.

Carlos Novillo Madrilgo Erkidegoko Ingurumen, Nekazaritza eta Barne kontseilariak Cenicientos udalerrian jarritako Aginte Postu Aurreratuan azaldu duenez, suak 6.000 hektarea inguru erre ditu eskualde horretan, eta ohartarazi du datozen 24 orduak “oso zailak” izango direla, haize-bolada bortitzak direla eta.

Ez dago itzaltzeko modurik

"Oraingoz ez dago sutea itzaltzeko modurik. Saiatuko gara hegalak kontrolpean izaten, baina eguraldia aldatu arte ezingo dugu suaren fronte nagusia geldiarazi", adierazi du Novillok. Horren esanetan, gauean eta, batez ere, larunbatean aurreikusitako tenperatura-jaitsierak, hezetasunaren igoerak eta haizearen norabide-aldaketak suaren bilakaera hobetzea espero dute.

Hala, kontseilariak esan du larrialdietarako zerbitzuen beste kezka nagusia Avilako Burgohondo udalerrian piztutako sutea Madrilgo Erkidegora iristeko arriskua dela. Hala ere, erantsi duenez, printzipioz ez da espero hori datozen orduetan gertatzea. Nolanahi ere, arrisku hori murrizteko lanean ari dira, horren esanetan, baldintza meteorologikoak ikusita.

Larrialdi Militarreko Unitateak (UME) zuzentzen duen operatiboaren lehentasuna "bizitzak salbatzea" dela nabarmendu du. Madrilgo Erkidegoak "bere historiako dispositiborik handiena" du martxan, nahiz eta baliabide batzuk gorde behar dituen muturreko arrisku-egun hauetan beste sute batzuk piztuko balira ere erantzun ahal izateko.

Madrilgo Erkidegoko historiako suterik larriena

Oraingoz, Madrilgo Erkidegoan piztuta dauden bi suteak (Almoroxetik iritsitakoa eta San Martín de Valdeiglesiasen su hartu zuen ibilgailu batek eragindakoa) fronte bakarrean elkartu dira. Isabel Diaz Ayuso Madrilgo Erkidegoko presidentearen hitzetan, "Madrilgo Erkidegoko historiako suterik larriena" da.

Sute hori Madrilgo Erkidegoko beste herri batzuetara hurbiltzen ari da, eta gero eta gertuago ditu Navas del Rey, Chapineria eta Colmenar del Arroyo. Hori dela eta, agintariek udalerri horiek ebakuatzeko agindua eman dute. Ondorioz, beste 9.000 pertsona inguru ebakuatu beharko dituzte, aurretik 10.000 pertsona baino gehiago ebakuatu eta gero.

Egoera ikusita, Barne Ministerioak 2 Es-Alert mezu bidali ditu ebakuazioak antolatzeko, eta harreraguneak atondu ditu udalerri hauetan: Navalcarnero, Mostoles, Alcorcon, Leganes, Brunete, Villanueva de la Cañada, Villaviciosa de Odon eta Las Rozas.

Fernando Grande-Marlaska Barne ministroak goizeko lehen orduan esan du eguneko helburu nagusia Madrilgo Erkidegoko sutea eta Avilako Burgohondo udalerrikoa bat ez egitea zela. Azken horrek 9.000 hektarea baino gehiago erre ditu jada.

Halaber, egoera larria ikusita, Espainiako Gobernuak larrialdi nazionala ezarri du ostegun honetan Madrilgo Erkidegoan eta Avila probintzian (Gaztela eta Leon), lurralde horietan piztu diren lau suterengatik. Suhiltzaileak garrak kontrolatu ezinik ari dira oraindik. 

Larrialdi nazionala ezarri ondotik, UMEk bere gain hartu du sutearen kudeaketa eta koordinazioa. 

Baldintza meteorologiko zertxobait hobeak

Fernando Grande-Marlaska Espainiako Barne ministroaren arabera, haizea apur bat baretu egingo da goizaldean. Horrek aukera emango du Madrilgo Erkidegoko eta Avilako suteei lurretik aurre egiteko.

"Une honetan ezin gara oso baikorrak izan, baina errealistak gara", adierazi du Barne ministroak. Azaldu duenez, haize gutxiago, hezetasun handiagoa eta tenperatura baxuagoak espero dira datozen orduotan. Baldintza meteorologiko horiek zertxobait hobeak izango dira piztutako suteei aurre egiten laguntzeko. Testuinguru horretan, 45.000 pertsona baino gehiago ebakuatu edo etxean konfinatu behar izan dituzte jada Madrilgo Erkidegoan.

Larunbatean iritsiko dira sua itzaltzen laguntzeko asmoz Italiak eta Greziak bidalitako lau hegazkinak. Horrez gain, sei autonomia erkidegoren laguntza eskaintzak onartu dituzte. Guztira, 3.000 larrialdi-langile baino gehiago ari dira lanean.

Madrilgo Erkidegoan 25.000 pertsona ebakuatu dituzte eta beste 20.000 konfinatuta daude. Avilan, berriz, 8.000 lagun etxetik atera dituzte eta 5.000 konfinatuta daude. Gauzak horrela, bi sute horiek 60.000 pertsonari eragin diete dagoeneko.

Guardia Zibilak pertsona bat atxilotu du eta beste bat ikertzen ari da Burgohondon (Ávila) piztutako baso-sutearen ustezko erantzule gisa. Suteak 9.000 hektarea baino gehiago erre ditu dagoeneko, eta ikerketaren arabera, jatorria makinaria astuna erabiltzean izandako zuhurtziagabekeria larria izan zen. Gainera, eremu horretan debekatuta zegoen halako makineria erabiltzea.

Antza denez, ikertutako bi pertsonek txinpartak sortu zituzten makina erabiltzen ari zirela, eta horiek piztu zuten sua. Lan horiek Gaztela eta Leongo Juntak mendian sua eragin zezakeen makineriaren erabilera debekatuta zuen egunetan egin zituzten.

Burgohondoko sutea bereziki bortitza izan da: ostegun arratsaldean 30 kilometro egin zituen 40 minutuan, eta sugarrek Iruelasko Haraneko Natura Erreserbara ere iritsi ziren.

Pedro Sanchez Espainiako Gobernuko presidenteak esan du "egoera dramatikoa" dela hainbat probintziatan eta inguruko herrialdetan (Frantzian kasu) suteen eraginez, eta kontu handiz ibiltzeko, agintarien aginduak betetzeko eta arriskuak saihesteko gomendatu du.