Hasiera eta amaiera

Hasiera guztiek amaiera dakarte derrigorrez. ez baitago betiereko ezer. Bukaera orok aldiz ziurgabetasuna sortzen du, ez dakigu beste sorreraren bat izango ote den. Gizakiok hala ere benetako zaletasuna dugu denborari mugak jartzeko, inguruan gertatzen denari erantzuna emateko beharra izan liteke,agian gure iraungipenaren aitortza besterik ez. Baina ezinbestekoa zaigu hasten den horren iraupena zenbatekoa den, noiz agortu edo aienatuko den jakitea.

Urte sasoi honetan, amaitzear den aroari gain-begirada ematea benetako ohitura bihurtu zaigu, gure berezko amaiera udarak adierazi arren, eta iraila izan gure bizitza antolaketan hasieraren seinale. Esan ohi da gizakiok jainkoak asmatu genituela bukaeraz jabetu ginenean, heriotzaz ohartu ginelako. Harrezkero ahitutakoak sorrera eskatzen digu nahitaez, debekatuta dugu azken mugaraino iritsi garela onartzea. Horregatik agian, iraganaren azterketa egin bezain azkar datorrena iragartzen saiatzen gara, asmakizun hutsa izango dela jakin arren.

Kontraesanez betetako urtea dihoakigu eta egutegiaren lehen orrialdean azaltzen zaigunak ez digu apenas ezer konponduko. Aurten emakumeen aldarrikapenak inoiz baino indartsuago sumatu eta entzun ditugu. 'Me too' izeneko mugimenduak bazter guztietan izan du oihartzuna. Elkartasun oihuak eta aldaketarako aginduak mundu osora zabaldu dira. Aldi berean "gizon indartsuak", ar nagusiaren adierazleak dira jaun eta jabe,beraiek agintzen dute,beraiek hartzen dituzte erabakiak. Eta aginte postuetan dauden emakumeen irudia eta indarra asko ahuldu da.

Teknologiari esker pertsonak eta herriak elkartzeko aukerak inoiz baino handiagoak dira,baina zatiketa eta bakardadea arazo larrienak bihurtu zaizkigu. Estatu eta gobernuen artean oinarrizko adostasuna lortzeko zailtasunak handiak dira, baita hil ala biziko arazoetan ere. Klima aldaketari eman beharreko erantzuna finkatzerako orduan oso berandu gabiltzala diote adituek,baina gure agintariek, hemen ere uste dute amaierak hasiera dakarrela halabeharrez. Egun osoa baten baterekin harremanetan gaudela uste dugun arren,gero eta aukera gehiago ematen omen dizkiguten telefono adimendunek,bakardadea areagotu egin dute.Kablerik gabeko konexio horren beste aldean daudenek ezin dutelako asetu oinarrizko adiskidetasunaren beharrak.

Munduak jiraka segiko du gutariko batzuk jaitsi beharrean izango bagara ere. Baina amaitzear den sasoi honek, eta datorren ustezko berriak ez digute berez ezer konponduko. Denbora, jakinkoak bezalaxe gizakiok asmatu genuelako, eta haien modura ez digulako soluzio biderik eskainiko, gure bizitza bere aginduetara antolatu arren.