Arduratzeko modukoa

Esan ohi da boteretsuenak zerbaitengatik arduratzen badira kezkatzeko ordua iritsi dela. Urtetan, ekologia zoro zentzugabe gutxi batzuen buruhaustea izan zen, esaten eta salatzen zutena irribarrez hartzen genuen, umeei arrazoia ematen zaien moduan hura serioa zela onartzen genien. Baina halako batean, munduko ahaltsuenek ohartarazi gintuzten arriskuan ginela, zoro haiek ziotena egia zela.

Gero ikusi genuen kapitalismoaren aitzindari den herrian, doktrina horren arauak hautsi eta ezinbestekoak omen ziren legeak saihesten. Orduan konturatu ginen krisia benetan larria zela. Orain Europar Batasuneko arduradun gorenek esan digute Elkartearen oinarri demokratikoak usteltzen hasi direla, zenbait herrialdetan gobernuak eskubideak zapaltzen ari omen direla. Etorkinekiko jarrera erabat onartezina dela gero eta leku gehiagotan. Juduen eta musulmanen aurkako gorroto portaerak ugaritzen ari direla…

Horrelako salaketak beti izan dira, baina baliteke oraingo honetan beste ezaugarri batzuk izatea. Gero eta ohikoagoa da buru politikoen ahotan edo iritzi emaile zenbaiten idatzietan entzun edo irakurtzea, iritzi batzuk izan edo adieraztegatik ez dugula gure burua gutxietsi behar. Ideia guztiak, baita uste bitxienak ere, errespetagarriak direla eta ez dugula lotsatu behar. Politiko ezjakinenek harro erakusten dituzte gabezia guztiak, borondate hutsa nahikoa bailitzan helburuak lortzeko. Eta itxuraz, jende askok lotsa galdu du, beldurrik gabe azaltzen ditu orain dela gutxi arte onartezinak izan diren aburu eta jokaerak. Beste zenbaitek, berriz, buruan duena ezkutatu arren, sare sozialen bidez helarazten du, edo botoaren bidez, nori kalte egingo dion garrantzitsuagoa izanik, eraiki lezakeen hautabidea baino.

Aldaketa asko, baita sakonenak ere, sarri antzeman gabe gertatzen dira. Egunerokotasunean ez da ezer aldatzen, kaleak, etxeak, urrutiko pertsonak eta gertukoak betiko lekuan daude, baina ezer ez da berdin. Gehienok pentsatzen dugu gizarteak bere kasa eraiki eta antolatzen direla, askatasuna, demokrazia, eskubideak, ongizatea berezko dohainak direla, beti hor izan direla eta betiko egongo direla… Agintariak, boteretsuenak, ahaltsuak kezkatuta dabiltza, urtetan lortutako orekak hausteko arriskuan dira eta ondoren zer etor liteken inork ez daki. Ziur aski batzuek besteek baino gehiago izango dute galtzeko, baina zalantzarik gabe "konplexurik gabe" jokatzeko esaten diguten horiek eskaintzen dutenak ez du duguna hobetuko, eta deskuidatzen bagara, ditugun ardurak hartzen ez baditugu, betirako uste genuena esku artean hauts bihurtu dakiguke.