Sadiq Khan Londreseko alkateari 'galtzaile' deitu dio Trumpek

Donald Trump Ameriketako Estatu Batuetako presidenteak Sadiq Khan Londreseko alkatearen aurka egin du Twitter sare sozialean. "Galtzaile" deitu dio, eta Bill de Blasio New Yorkeko alkate "ergel eta ezgaiarekin" alderatu du.

AEBko presidentea Erresuma Batura heldu da astelehen honetan, hiru eguneko bisita ofiziala egiteko. Besteak beste, Isabel II.a erreginarekin eta Theresa May lehen ministro kontserbadorearekin bilduko da.

Twitter sare sozialean botatako lehen mezuan, "handik zein hemendik begiratuta, Sadiq Khanek lan negargarria egin du Londreseko alkate gisa, AEBko presidentearekin 'desatsegina' izan da, ezbairik gabe Erresuma Batuaren aliatu nagusiarekin", esan du Trumpek.

Politikari laborista "galtzaile bat da, eta Londreseko delinkuentzian arreta jarri beharko luke, ez nigan…", erantsi du buruzagiak.

"Khanek (Bill) de Blasio gure New Yorkeko alkate ergel eta ezgaia gogorarazten nau, alkatetzan ere lan negargarria egin duelako, baina ez da hura bezain garaia. Nolanahi ere, Erresuma Batuaren lagun handia izateko gogoa dut, eta bisitatzeko gogo handiak ditut", azaldu du beste txio batean.

....Kahn reminds me very much of our very dumb and incompetent Mayor of NYC, de Blasio, who has also done a terrible job - only half his height. In any event, I look forward to being a great friend to the United Kingdom, and am looking very much forward to my visit. Landing now!

— Donald J. Trump (@realDonaldTrump) 3 de junio de 2019

Londreseko alkatearen bozeramaile batek irainei erantzun die: "Haur baten irain batzuk baino askoz larriagoa da, Ameriketako Estatu Batuetako presidentearen azpitik egon beharko lirateke".

"Sadiqek Londres eta gure herrialdearen balio aurrerakoiak ordezkatzen ditu", azpimarratu du iturriak. Bozeramailearen ahotan, Trump "eskuin muturreko mehatxu handiaren adibiderik amorragarriena da, gure demokrazia liberalek 70 urte baino gehiago defendatu izan dituzten funtsezko balioak arriskuan jartzen ari delako".

Iragan igandean, The Observer igandekariak zabaldutako artikulu batean, AEBko agintariak bere jarraitzaileak mobilizatzeko erabilitako hizkera "XX. mendeko faxistekin" alderatu zuen Londreseko alkateak.

Azkenik, Trumpi egindako harrera kritikatu zuen Khanek.