Ehunka afganiarrek manifestazioa egin dute Kabulen talibanen aurka protestatzeko

Ehunka afganiar atera dira kalera ostegun honetan Kabulen talibanen aurka protestatzeko. Herrialdeko agintea berreskuratu duten talibanak identifikatzen dituen bandera zuriaren aurrean, Afganistango hiru koloreko bandera aldarrikatu dute manifestariek. "Gure nortasun nazionala da", nabarmendu dute, batasun eta erresistentziaren ikurra dutelako.

Hala, hiru koloreko banderak aurre egin die talibanei, Afganistan Britainiar Inperiotik independizatu zenetik 102 urte diren egunean. Azken hogei urteotan lehen aldiz egin dute oroipen hori talibanak agintean daudela; izan ere, igandean Kabul hartu zuten, erresistentziarik topatu gabe, Ashraf Ghani presidenteak herrialdetik ihes egin ostean.

Boterean zeudela erakutsitako basakeria kontuan izanik talibanek beldurra sortzen badute ere, Afganistango hiru koloreko banderaren aldeko hainbat protesta izan dira herrialdean. Kabul hiriburuan ehunka lagun irten dira kalera, orain arteko bandera aldean zutela eta hiria zaintzen ari diren soldaduei aurre eginda. Horrelako manifestazioak beste hiri batzuetan ere izan dira azken egunotan, Jalalabad eta Khost hirietan, besteak beste.

Hiru koloreko banderak (beltza, gorria eta berdea da, ezkutuan aldaketa txiki batzuk izan baditu ere) protagonismo handia izan du herrialdeko historian zehar; bereziki, azken hogei urteotan, erregimen talibana 2001ean erori ostean. Dena dela, talibanek aldatu egin dute ikur hori, bandera zuriaren alde eginez: ikur berriak Shahada du, fede islamikoaren adierazpena, eta talibanen Emirerri Islamikoa ordezkatzen du.

Talibanek ere gogorarazi dute herrialdea Britainiar Inperiotik independizatu zenetik 102 urte bete direla; euren esanetan, orain ere garaitu dute "beste superpotentzia harroputz bat" (Ameriketako Estatu Batuak).

Afganistango presidenteordeak erresistentziarako deia egin du bere burua presidente jo ostean

Testuinguru horretan, talibanen garaipenaren ostean Ashraf Ghani presidenteak Afganistandik ihes egin duela eta, bere burua bitarteko presidente jo du Amrullah Saleh presidenteordeak eta erresistentziarako deia egin die afganiarrei.

Saleh Panjshir eskualdean dago (Kabuldik ehun bat kilometrora), talibanen kontrako borrokan geratzen den gotorleku bakarrenetarikoan.

Bestalde, talibanek esan dute ez dutela nazioarteko betorik ezartzeko asmorik, eta euren nahia dela "herrialde guztiekin harreman diplomatiko eta komertzial onak" izatea.

Talibanek duela 20 urte erakutsitakotik urrun dagoen asmoa erakutsi dute, eta erabakiak hartzeko inklusibotasunaz edo giza eskubideak errespetatzeaz hitz egiten dute.

Kabulgo aireportuaren kanpoaldean, kaosa da nagusi; milaka afganiar daude bertan, barrura sartu ezinik, eta segurtasun-indarrek airera tiro egiten dute tarteka.

Aireportura iristen diren familietako asko hartuko dituzten herrialdeetako enbaxaden deia jasota ari dira bertaratzen; hitzordua dute aireportuko ateetako batean, baina hor amaitzen da enbaxadek eman diezaieketen laguntza.