Erdoganek irabazi ditu hauteskundeak, baina ez bigarren itzulia saihesteko gehiengoarekin

Recep Tayyip Erdogan Turkiako egungo presidente eta berrautaketarako hautagaiak agintean jarraitzeko pauso garrantzitsua eman du igandean, presidentea aukeratzeko hauteskundeak irabazita. Bozkatuena izan bada ere, ez du bigarren itzulia saihesteko gehiengo osorik, eta, ondorioz, herritarrak berriro bozkatzera deituko dituzte hilaren 28an, herrialdeko presidentea hautatzeko.

Zehazki, Erdoganek botoen % 49,4 lortu ditu, eta Kiliçdaroglu sozialdemokratak, berriz, % 44,96, botoen % 99 zenbatuta hauteskunde batzordeak gaur zabaldutako datu ofizialen arabera.

Oso atzetik legoke Sinan Ogan hautagai ultraeskuindarra, botoen % 5,2 lortuta, baina haren babesa funtsezkoa izan liteke hauteskundeen bigarren itzulian.

Azken egunetako inkestek aurreikusitakoa baino emaitza hobeak lortu ditu Erdoganek. Botoen kontaketa erabat amaitu ez bada ere, Erdoganek bere jarraitzaileen aurrean esan du Kiliçdaroglu oposizioko hautagaiaren "aurretik" doala. Are gehiago, lehenengo itzulian gehiengoa lortzea espero duela adierazi du.

Atzerriko botoak zenbatzea falta da behin betiko emaitzak ezagutzeko.

Oposizioak manipulazioa salatu du

CHP sozialdemokratak, Turkiako oposizioko alderdi nagusiak, salatu du presidenterako hauteskundeetan "manipulazioa" izan dela emaitzak biltzerakoan, eta Kemal Kiliçdaroglu hautagaiak Recep Tayyip Erdogan egungo estatuburua garaitu duela esan du.

"7,5 milioi boto ez dira sisteman sartu; hain justu, indartsuenak garen lekuetakoak. Emaitzak manipulatzen dituzte eta jendea behartzen dute gau osoa telebista aurrean ematera", salatu du Ekrem Imamoglu Istanbulgo alkateak.

Kexuak bi aldeetatik

Hauteskunde-eguna gorabehera handirik gabe igaro bada ere, tentsioak gora egin du zenbaketak aurrera egin ahala, batez ere hautagaien eta alderdien artean.

Kiliçdarogluren alderdiak (CHP) datu fidagarririk ez ematea leporatu dio Anadolu agentziari, eta AKPri boto-txartelen zenbaketa blokeatu izana, bai eta aktak inpugnatu izana ere oposizioa indartsuagoa den tokietan.

Ildo horretan, hautagaiak berak "beren postuak ez uzteko" eskatu die kontu-hartzaileei eta zenbaketan parte hartzen duten boluntarioei, zenbaketa behar bezala egiten dela ziurtatzeko. 

Ankarako alkate Mansur Yavas sozialdemokratak ziurtatu duenez, hiri handien zenbaketa osoa sartzen denean, oposizioko hautagaiak gehiengo osoa izango du lehen itzulian presidenterako hauteskundeak irabazteko. 

Erdoganek CHP kritikatu du zenbaketaren iragarpen ofiziala egin baino lehen emaitzak zabaltzen hasteagatik, eta hauteskunde-mahaietako ordezkariei boto-zenbaketa ez uzteko eskatu die. 

"Hauteskundeak hain giro positibo eta demokratikoan egin direnean eta botoen zenbaketak oraindik jarraitzen duenean, emaitzak presaka iragartzen saiatzeak herritarren borondatea usurpatzea esan nahi du", esan zuen presidenteak.

Presidenterako hauteskundeekin batera, Parlamenturako hauteskundeak ere egin dituzte igandean Turkian. Hauteskunde horietan, AKPren (Erdoganen alderdi islamista) inguruan osatutako aliantzak botoen % 50 eta Parlamentuko 600 diputatuetatik 324 erdietsi ditu; beraz, duela 20 urtetik duen gehiengo osoari eutsiko dio.

CHP alderdi sozialdemokrata 134 eserleku izatetik 167 izatera igo da, eta koalizioko kide duen IYI alderdiak, berriz, 44 eskuratu ditu. HDP alderdi ezkertiar eta kurduak hirugarren indarra izaten jarraituko du, 62 eserlekurekin.