Etxe Zuriak "Trump TV" kanala estreinatu du, AEBko hainbat komunikabideri betoa jarri ostean
Donald Trumpen gobernuak streaming plataforma berria martxan jarri du CNN, MS NOW eta Politico hedabideei Etxe Zurira sarrera debekatu ostean, "albiste faltsuak" zabaltzea eta segurtasun nazionalari kalte egitea egotzita.
Ameriketako Estatu Batuetako Gobernuak “Trump TV“, YouTubeko bere kanal propioa kaleratu du astelehen honetan. Emisioak hainbat komunikabideri betoa jarri ostean sortutako polemika betean hasi dira; izan ere, buruzagi errepublikanoak berari eta bere Administrazioari buruzko "albiste faltsuak" argitaratzea leporatzen die hedabide horiei.
"Zuzenean gaude. Trump TV streamingean dago dagoeneko", esan du Etxe Zuriak sare sozialetan zabaldutako mezu batean. Bertan azpimarratu dutenez, plataformak etengabe emitituko du eta "iragarkiak", "iraganeko une gogoangarriak" eta "Administrazioaren azkena eta onena" bilduko ditu. "Dena leku bakar batean", adierazi du.
Lehen emisioa Donald Trumpek uztailaren 3an Rushmore mendian emandako hitzaldia izan da, Estatu Batuen independentziaren 250. urteurreneko ekitaldien barruan. Estreinaldi hau Etxe Zuriko informazio-zerbitzu bateratua egiten duten telebista kateek euren jarduera eten duten egun berean iritsi da, Trumpen Administrazioak CNNri seinalea grabatzea eragotzi ostean.
Trumpek asteburuan iragarri zuen Etxe Zurirako sarbidea debekatuko ziela CNN eta MS NOW kateei eta Politico egunkari digitalari. Erabaki horren aurrean, CBS, FOX News, NBC eta ABC kateek elkartasuna adierazi zioten CNNri eta euren jarduerak bertan behera utzi zituzten. Bost kate hauek txandaka grabatzen dute presidentea, eta euren irudiak tokiko zein nazioarteko gainerako hedabide guztiei helarazten dizkiete; beraz, gatazka hau dela medio, Etxe Zuriko ekitaldiak audio gabe edo baliabide oso eskasekin emititzen ari dira.
Polemika honek bide judiziala hartu du; izan ere, betoa jasan duten hiru hedabideek (CNN, MS NOW eta Politico) salaketa bateratua jarri dute Donald Trump presidentea eta bere Administrazioko goi-kargudunen aurka.
Zure interesekoa izan daiteke
Zergatik biltzen ari dira NBEko liderrak eta zer izango dute mintzagai?
Ekialde Hurbila, Ukraina eta AA izango dira protagonista 100 buruzagi baino gehiago hartuko dituen NBEren biltzarrean
Merzek sozialdemokratekiko koalizioa mantendu egingo duela agindu du, "Alemaniaren etorkizun demokratikoaren alde"
AEBko hedabide nagusiek uko egin diote Etxe Zuriko ekitaldien berri emateari, CNNri ezarritako betoaren ostean
Putinen alderdiak ia bermatuta du gehiengo konstituzionala, gerran egonda egindako lehen hauteskundeetan
Ezkerrak irabazi du Berlinen, eta AfDk lortu du garaipena Mecklenburg-Aurrepomerania eskualdean
Putinen alderdiak irabazi ditu hauteskunde legegileak, botoen % 57,5 eskuratuta
Ehunka herritarrek manifestazioa egin dute Tarajaleko mugaraino migratzaileak "berehala kanpora ditzaten" eskatzeko
