Israel: "Gure betebeharra Gazan sartzea da"

Tentsioa maila gorenean dago Gazako mugan, eta ehunka tanke eta soldadu daude bertan lurreko inbasioa hasteko agindua jasotzeko zain.

Israelgo Indar Armatuen buruak, Herzi Halevi jeneralak, Gazako Zerrendaren inguruan bildutako tropen aurrean ziurtatu du "laster" sartuko direla Palestinako enklabean eta "irabazteko" sartuko direla.

"Orain, gure betebeharra Gazan sartzea da, Hamas dagoen lekuetara joatea. Edonon erasoko diegu, komandante guztiei, kide bakoitzari; azpiegitura suntsitzera goaz; irabaztera, hitz batean", adierazi du.

Israelgo Energia ministro Israel Katzek iragarri du Gaza hegoaldeko hainbat eremutarako ur-hodiak zabalduko dituztela, Benjamin Netanyahu Israelgo lehen ministroak eta AEBko presidente Joe Bidenek hala adostuta. 

Lurreko erasoaldia asteburu honetarako zegoen aurreikusita, baina eguraldiagatik atzeratu dute, antza. The New York Times egunkariak zabaldu duenez, zeru lainotua oztopo da Israelgo Armadarentzat, lurretik ari diren soldaduei laguntzeko erabiltzen dituzten droneak eta hegazkinak gidatzea zailtzen duelako.

Aipatu iturrien arabera, soldadu israeldarrak Gazan sartu ahala Hamasek pasabide gisa erabiltzen dituen tunelak eraistea espero du Armadak.

"Armetan altxatu diren munstro gaiztoak suntsitzeko prest"

Benjamin Netanyahu Israelgo lehen ministroa larrialdiko gobernuaren lehen agerraldi publikoaren buru izan da. "Gure borrokalari zoragarriak prest daude edozein unetan gure aurka armetan altxatu diren munstro gaiztoak suntsitzeko", adierazi du.

"Hamasek uste zuen desegin egingo gintuela, baina gu izango gara Hamas desegingo dugunak", gaineratu du.

Israelgo Armada Gazako Zerrenda osoari erasotzeko prestatzen ari da

Hamas Erresistentzia Mugimendu Islamikoko zuzendaritza politikoa eta militarra suntsitzea da Israelgo Armadaren helburua, aurreko asteko erasoaldian 1.400 israeldar baino gehiago hil ostean, 286 militar tartean.

Israelek Gaza bonbardatuz erantzun dio Hamasi, eta 2.450 palestinar hil ditu orain arte.

Gazako egoera humanitarioa gero eta zailagoa da Israelen balizko inbasioaren atarian

Gainera, Gazako Zerrenda ur eta argindar hornidurarik gabe utzi du, eta ez du laguntza humanitarioa sartzen uzten.

Ebakuazioa blokeatzea egotzi diote Hamasi

Israelek ultimatuma eman zuen Gazako iparraldea jendez husteko, eta zibilen ebakuazioa blokeatzea egotzi dio Hamasi. Horren aurrean, Israelgo Armadak iragarri zuen Gaza iparraldeko eta erdiguneko herritarrentzat korridore bat irekiko zuela 10:00etatik 13:00etara (Euskal Herriko 09:00etatik 12:00etara). Israelek hitzeman zuen zibilek "bonbardaketa arriskurik gabe" erabili ahalko zutela Saladino errepidea Khan Yuniseraino.

Jonathan Conricus koronel israeldarrak Gaza iparraldetik alde egiteko deia egin zien herritarrei, eta ohartarazi zien lurreko tropak zabaldu dituztela Gazako muga osoan, eta "operazioaren hurrengo faserako prestatzen" ari direla.

"Entzun gure oharrak. Jarduera militar handiak egongo direla esaten ari gara, eta zibilei ebakuatzeko deia egiten diegu, euren segurtasunagatik", azpimarratu zuen Conricusek mezu ofizial batean.

Joe Biden AEBko presidenteak telefonoz hitz egin du Mahmoud Abas Palestinako Aginte Nazionaleko presidentearekin, Gazako laguntza humanitarioari buruz.

Bidenek Abasi esan dio eskualdeko kideekin lan egiten ari dela Gazako herritarrek laguntza humanitarioa jaso dezaten.

Iranen abisua

Israelek Gazan egindako krimenen aurrean "ikusle" hutsa ez dela izango ohartarazi du Iranek, eta gatazka eskualdean zabaltzeko aukeraz ohartarazi du.

Hosein Amir Abdolahian Irango Atzerri ministroak, Iraken, Libanon, Sirian eta Qatarren bira bat egin ostean, ohartarazi du gerran beste fronte batzuk irekitzeko aukerek "gora" egiten dutela "orduro", Gazako erasoak gelditzen ez badira: "Agertoki guztiak mahai gainean daude".

Hamasen komandante bat hil dute

Bien bitartean, Israelgo Defentsa Indarrek iragarri dute Bilal al Kedra Hamaseko komandantea hil dutela. Nirim eta Nir Oz kibbutzetako erasoen ardura egozten diote.

Gainera, Hamaseko eta Palestinako Jihad Islamikoko kide batzuk ere hil dituztela jakinarazi dute.

Era berean, larunbatean iragarri zuten Murad Abu Murad Hamasen operazioen burua eta Ali Qadi Nujba erasorako indarretako komandantea hil zituztela.