Israelek Gazako ospitale nagusiak setiatu ditu, eta dagoeneko 11.000 hildako baino gehiago utzi ditu

Israelgo Armada Gazako Zerrendako iparraldeko ospitale nagusietako batzuk inguratzen hasi da, Al Shifa Ospitalea barne, eta gutxienez 20 pertsona hil ziren bertan Israelen eraso baten ondorioz. Dagoeneko, Israelek 11.000 palestinar baino gehiago hil ditu urriaren 7an Hamas talde islamistak erasoa egin zuenetik.

Al Shifa Ospitalearen aurkako erasoa egiteaz gain, Zerrendako iparraldeko beste ospitale batzuk inguratu ditu Israelko Armadak, hala nola Al Rantisi ospitale pediatrikoa, ospitale psikiatriko batetik eta zentro oftalmologiko batetik gertu dagoena. Gainera, Palestinako Ilargi Gorriak "liskar bortitzak" salatu ditu Al Quds Ospitalean; gutxienez pertsona bat hil eta 20 zauritu dira bertan.

Era berean, Indonesiako Ospitalea argindarrik, urik eta komunikaziorik gabe geratu dela ziurtatu du Gazako Osasun Ministerioak.

Gazako Ilargi Gorriko bozeramaile batek esan duenez, ospitale askotan erregai eskasiagatik dagoen elektrizitate faltagatik, Al Quds Ospitaleko osasun-langileak, esaterako, "gutxieneko baliabideekin ari dira lanean", argirik gabe eta "hirugarren egunez jarraian komunikazioak eta Internet etenda".

Martin Griffiths Nazio Batuen Erakundeko laguntza humanitarioaren buruak X sare sozialean gogor salatu du gertatutakoa, eta laguntza humanitarioa ematen duten lekuen kontrako erasoak geldiarazteko eskatu du: "Nazioarteko lege humanitarioaren pean, ospitaleak babestu egin behar dira".

Bestalde, Israelgo Armadak 25 eta 50 pertsona artean hil ditu ostiral honetan Gazako eskola publiko baten aurka egindako bonbardaketan, medikuek eta Gazako Gobernuko iturriek jakitera eman dutenez. Eraso horretan, Ismael Haniyeh Hamaseko buruzagi politikoaren biloba bat hil dela jakinarazi dute.

Gazako Gobernuko iturri batek EFEri azaldu dionez, Gazako Al Naser auzoko ikastetxeari egindako erasoan hildakoak 50 izan daitezke. Al Shifa Ospitaleko zuzendariak esan du gutxienez 25 hildako iritsi direla osasun-zentro horretara.

1.000 hildako baino gehiago eta ia 27.500 zauritu

35 eguneko gerraren ostean, Israelen bonbardaketen ondorioz Gazan hildakoak 11.000 baino gehiago dira dagoeneko, eta zaurituak, berriz, ia 27.500, Osasun Ministerioko iturriek jakitera eman dutenez.

"Israelen erasoaren ondorioz hildakoak 11.078 izan dira, tartean 4.506 haur, 3.027 emakume eta 678 adineko", eta 27.490 zauritu daude, Ashraf al Qudra Osasun bozeramailearen hitzetan.

Horren esanetan, azken orduetan Israelek "12 sarraski handi egin ditu, eta 260 pertsona hil dira". Halaber, gutxienez 2.700 desagertu daudela ohartarazi du, tartean "oraindik hondakinen azpian dauden 1.500 haur".

Bestalde, Israelgo Armadak ziurtatu du Gazako borroken eta erasoen ondorioz "dozenaka miliziano" hiltzen direla egunero, eta bozeramaile militar batek ziurtatu du brigada blindatu batek Hamaseko milizianoei ere eraso diela Gazako hondartza inguruetan, eta iparraldeko sektorean "haren gotorlekuen kontrola" hartu duela.

100 langile baino gehiago hil direla salatu du UNRWAk

Testuinguru horretan, UNRWA Palestinako Errefuxiatuei Laguntzeko NBEren Agentziak salatu du azken hilabetean 100 langile baino gehiago hil direla Gazan, Israelek Gazako Zerrendaren aurka egindako bonbardaketa gogorren ondorioz.

UNRWAren arabera, erakundearen historian gatazka batean hildako Nazio Batuetako langile humanitarioen kopuru handiena da.